Бунда "Насаф" бош мураббийи Рўзиқул Бердиев иштирок этди.
- Ўйин ҳақида фикрингиз?
- Андижонда доим яхши футбол муҳити ҳукм сурган ва буни кўп бора айтганмиз. Бугун ҳам шундай бўлди, иккала жамоа чиройли ўйин кўрсатишга ҳаракат қилди. Ҳар икки жамоа Кубокда гуруҳдан биринчи ўрин билан чиқишни мақсад қилган. Ўйин курашларга бой кечди, иштиёқ юқорилиги кўриниб турди. Йигитларимизга катта раҳмат айтиб қоламан. "Андижон" таркибидан келиб чиққан ҳолда иккинчи рақам билан ўйнашни лозим топдик. Ҳимояда яхши ўйин кўрсатдик деб ўйлайман. Дуранг натижа ҳам ёмон эмас.
- Голдан кейин жамоангиз дурангни ушлаб қолишга ҳаракат қилгандек кўринди.
- Тўғри айтдингиз, биз шундай ўйнадик. Бугунги ҳолатимиз ва таркибимиз билан "Андижон" жамоасига тенглашиш қийин. Буни жуда яхши тушуниб турибмиз. Рақиб сафида маҳоратли футболчилар кўп. Шу боис дуранг бизни қониқтирди. Футболчилар жойлашувига ўзгартириш киритганимиз рақибда ноқулайлик туғдирди ва бундан фойдаланиб гол урдик. Таркибимизда ёшлар кўп, улар ўз тажрибасини орттириб борса бу жамоамиз ютуғи бўлади.
