Равшан Ҳайдаров: "Биз учун энг муҳими - кейинги ўйин. Ҳар бир ғалаба бизни чемпионликка яқинлаштиради"

Равшан Ҳайдаров: Кейинги босқичга чиққанимиз билан мухлисларимизни табриклаймиз. Муҳим қадамни қўйдик. Йигитларга раҳмат айтаман. Улар режани тўлиқ бажаришди. Ақл билан, матонат билан ҳаракат қилдик. Учрашувнинг бошида бироз назоратни йўқотдик, аммо иккинчи бўлимда барчасини ўнглаб, ғалаба қозондик.

Беҳруз Каримов: Бугунги ўйин ажойиб, эмоцияга бой бўлди. Кейинги ўйинларни ҳам ютишга ҳаракат қиламиз. Биз бу ерга бекорга келганимиз йўқ. Тўғри, ёшимиз кичик бўлиши мумкин, аммо бизга ишонсангиз бўлади. Мақсадимиз - чемпионлик.

- Беҳрузга савол, сиз Суперлигада ҳам узоқ масофалардан гол урдингиз. Ўйиндан олдин ҳам шундай режа бормиди? Узоқ масофадан гол уриш яъни...

- Бор эди. Мен ҳар бир ўйинда вазиятимни кутиб юрдим. Бугун ўткир бурчакдан имконият бўлди, мен ўйлаб ўтирмасдан зарба йўлладим ва гол урдим. 

- Бугунги ўзгаришлар рақибга қийинчилик туғдирди. Амирбек ёки Саидумархонни майдонга туширилиши, чарчаган рақибга кутилмаган зарба бўлди деса бўлади. Шундай режа бормиди?

- Албатта, бугунги режа шундай эди. Икки футболчи ҳам олдинги ўйинда катта иш қилишди. Сиз таъкидлаган режа амалга ошди.

- Чорак финалга режангиз қандай?

- Гуруҳдан чиқдик. Рақибимизни эртага биламиз. Ўйиндан ўйинга мақсадни юқорироқ қўямиз. Плей-оффда рақибни яхши ўрганиб, режа билан ўйинларга борамиз. Таркибда ротация бўлиши мумкин, бу табиий. Ўйинни фақат кучайтириш ниятидамиз. 

- Гуруҳдаги иштирокда футболчиларингизги ўйинидан қанчалик қониқдингиз?

- Футболчиларимнинг ўйинга бўлган режага амал қилиш ва интизомни сақлашидан мамнун бўлдим. Ҳа, барча футболчиларимиз индивидуал жиҳатдан кучли, аммо ғалабага асосий сабаб тактикага амал қилганимиз бўлди. Борган сари ўйинимиз яхшиланиб боради деб умид қиламан.

- Футболчига савол, ўйинни Фабио Каннаваро кузатиб борди, бу сизга босим ёки мотивация бердими?

- Биз кутмагандик. Учрашувдан олдин ташқарида Каннаварони кўрдик. Бу нарса бизга босим юклагани йўқ, фақатгина қўшимча мотивация берди. Ўз ўйинимизни кўрсатиб, ғалаба қозондик. 

- Сиз бу каби турнирда ғалаба қозонгансиз. Сиздан яна чемпионликни кутсак бўладими?

- Биз олдимизга олий мақсад қўйганмиз. Чемпионлик учун кураш давом этади. Биз учун энг муҳими кейинги ўйин. Ҳар бир ғалаба бизни чемпионлик учун яқинлаштиради. Шу стратегия билан ҳаракат қилсак, чемпионликка ҳам эришишимиз мумкин.

- Ўзбекистон ўзининг потенциал рақиблари Хитой ёки Австралияни ўрганишга улгурдикми ё бу жараён энди бўладими?

- Хитойни жуда яхши биламиз. Ўртоқлик турнирларида улар билан кўп марта тўқнаш келдик. Улар ҳам ривожланмоқда. Таҳлилчиларимиз барча рақибларни ўрганиб боришмоқда. Эртадан ушбу маълумотларни йигитларга беришни бошлаймиз. Рақибни ўйин услубини ўрганган ҳолда, ўз услубимизни кўрсатишимиз лозим. Ҳа, бугун биринчи бўлим кўпчиликка ёқмаган бўлиши мумкин, аммо иккинчи бўлимда назоратни қўлга олдик. Рақибга қараб, тактикани ишлаб чиқамиз.