Равшан Эрматов Навоий вилоятида футболни ривожлантириш борасидаги ишлар билан танишди

Ташриф аввалида Равшан Эрматов вилоятдаги “Қизилқум” футбол клуби стадиони, академия ҳамда базанинг қурилиш-реконструкция ишларининг лойиҳаси билан яқиндан танишди. Масъуллар билан бўлган суҳбатда қурилиш ишларини жадаллаштириш, сифатли футбол майдонларини барпо этиш, иншоотларнинг ётоқхона ва ошхоналарини замон талабларига мос равишда жиҳозлаш, шунингдек, Европа академиялари каби барча талабларга жавоб берадиган шароитларни ташкиллаштириш бўйича топшириқлар берилди.

Шундан кейин клуб қошидаги болалар-ўсмирлар мактабининг фаолияти, инфратузилмаси ва мавжуд шарт-шароитлари кўздан кечирилди. Вилоят миқёсида болалар футболининг инфраструктураси юзасидан фикр алмашилди.

Келажакда Навоийдан кўплаб истеъдодли футболчилар етишиб чиқиши учун вилоятдаги футбол маҳорати мактабларининг фаолиятини тизимли ва халқаро стандартлар асосида ташкил этиш зарурлиги таъкидланди. Футбол мактабларида тарбияланаётган болалар нафақат жисмонан, балки маънан ҳам етук бўлиши, уларнинг таълим олиши ва китоб ўқиши зарур эканлиги айтилди.

Шунингдек, тарбияланувчиларнинг ота-оналари билан учрашув ўтказилди. Бола психологиясида, айниқса унинг етук спортчи бўлиб вояга етишида оиланинг роли катта эканлиги хусусида суҳбатлашилди. Очиқ ва самимий ўтган учрашувда ота-оналарнинг таклифлари тингланди ва келгусидаги ишларни биргаликда амалга оширишга келишиб олинди.