Пенальтилар серияси қаҳрамони Азизхон Исақов: «Барча «Қўқон-1912» жамоасига бефарқ бўлмаганларни Суперлига йўлланмасини қўлга киритганимиз билан табриклайман»

Ассалому алайкум, биринчи навбатда барча «Қўқон-1912» жамоасига бефарқ бўлмаганларни Суперлига йўлланмасини қўлга киритганимиз билан табриклайман. Бу ғалаба барчамизники. Улар совуқ бўлишига қарамасдан «Металлург»га қарши учрашувда стадионга келиб, дахшат қўллаб-қувватлашди. Бу бизга катта ишонч берди.

Пенальтилар серияси...

- Шерикларим дастлабки иккита пенальтидан фойдалана олмаганларидан сўнг менда ҳеч қандай ёмон хаёллар йўқ эди. Барчаси жойида эди. Ўзимда ва жамоадошларимга ишонардим. Биз ушбу пенальтилар сериясида ғолиб бўлиб кетишимизга ишончим бор эди. Пенальтилар сериясига жамоамиз мураббийлари билан жиддий тайёргарлик кўрдик. Учрашув аввалида мураббийимиз Хуршид ака рақиб футболчиларининг эҳтимолий йўллайдиган пенальтилар йўналиши ёзилган варақ ҳам тайёрлаб, баклашга ўраб бергандилар.

Жорий мавсум ўзингизнинг ўйинингиздан қанчалик қониқдингиз?

- Ҳар бир футболчи янада яхшироқ ҳаракат қилишга интилади. Умуман олиб қараганда, жорий мавсумдан анча кўнглим тўлди. Бироқ ҳали қилинадиган ишлар етарли. Янада кўпроқ меҳнат қилиб, яна ўсишга интиламан.

Умуман олганда Про лигадаги илк мавсумингизни ўтказдингиз? Про лига ва Суперлига жамоалари ўртасида қанчалик фарқ сезилди?

- Бу йилги Про лига жамоалари анча кучли эди десам, адашмайман. Буни Про лиганинг тўртта жамоаси Суперлигага йўл олганидан ҳам билиб олсак бўлади. Оддий ўйинларнинг ўзи бўлмади. Барча жамоалар максимал қаршилик кўрсатишди. Менимча ҳар бир учрашув шиддатли ўтди. Суперлига ва Про лига ўртасида катта фарқ сезилмади.

Нега айнан дарвозабонлик?

- Ёшлигимдан ўзимда дарвозабон бўлишга қизиқиш бўлган ва шу сабабли ёшлигимдан футболга келишим билан дарвозабон позициясидаман.