Ника Качарава: "Суперлигадаги футболчилар жисмоний жиҳатдан кучли экан"

- Ника, авваламбор жароҳатдан тузалиб майдонга қайтганингзидан хурсандмиз, Суперлига 4-турида "Бухоро" сафида дебют қилдингиз, янги мамлакат ва чемпионатга мослашиш жараёнлари қандай кечмоқда?

- Жароҳатдан фориғ бўлиб яна яшил майдонга қайтганимдан мен ҳам хурсандман, кейинги учрашувларда ҳам майдонга тушиб, жамоам учун ёрдам беришни интиқлик билан кутяпман. Мослашиш жараёнлари барчаси аъло даражада кетмоқда.

- “Бухоро” жамоасига қўшилиш варианти сизда қандай пайдо бўлди? Ўзбек футболи ва мамлакатимиз ҳақида сизда қандай маълумотлар бор эди?

- Барчаси жуда тез содир бўлди, йил бошида “Бухоро” жамоасидан таклиф олдим, Таклифни қабул қилиш ҳақида кўп ўйлаб ўтирмадим, боиси Ўзбекистон чемпионатида тўп тепган дўстларим орқали жуда кўп ижобий фикрларни эшитган эдим. Шу туфайли қарор қабул қилиш қийин кечмади.

- Фаолиятингиз давомида яхши савиядаги чемпионатларда тўп тепгансиз, Ўзбекистон Суперлигаси даражаси ҳақида қандай фикрдасиз? Сиз ўйнаган чемпионатлар билан солиштирганда қандай фарқлар мавжуд? 

- Суперлигада ҳозирча фақат битта учрашув ўтказдим, таққослаш учун ҳали эрта деб ўйлайман. Аммо ҳозиргача кўрганларим шундан иборатки, футболчилар жисмоний жиҳатдан кучли эканлигини таъкидлаб ўтмоқчиман.

- “Бухоро” чемпионатни муваффақиятли тарзда бошлади, жамоанинг дастлабки ўйинлардаги ўйини ҳақида қандай фикрдасиз?

- Дарҳақиқат чемпионатда яхши старт олдик, ортда қолган ўйинлар давомида йигитлар жуда яхши ўйин кўрсатишди. Ўйиндан-ўйинга ўзимизга бўлган ишонч ортиб бормоқда. Биз кейинги ўйинларда ҳам шу руҳда давом этишимиз керак.

- Биламизки, отангиз Кахабер Качарава ўз вақтида Грузияда машҳур футболчи бўлган, футболга кириб келишингизга отангиз ҳам сабаб бўлганми?  

- Албатта, мен футбол ўйнашни бошлашимга энг катта сабаб отам эди, Ёшлигимда унинг ўйинларини кўриб катта бўлганман ва ҳар доим унга ўхшашни хоҳлар эдим.

- Мухлисларнинг сиздан бу йилги мавсумдан умидлари катта, ишонамизки, мавсум давомида ўз голларингиз билан бухоролик ишқибозларни хурсанд қиласиз.

- Мен ҳам бу йилги мавсумдан умидларим катта. Мухлислар ишончини ҳис қилиб турибман. Бухоро” жамоасининг ғалабаларига ўз голларим билан ёрдам беришга тайёрман.

Отасига эмас, Роналдиньога ўхшашни хоҳлайдиган, гол нишонлагани учун жамоадан ҳайдалган "Бухоро"нинг икки ниқобли легионери билан танишамиз