Муҳаммад Коне: "Анчагина яхши шаклланган жамоани мағлубиятга учратдик"

“Темирйўлчилар” илк турда Муборакнинг “Машъал” жамоасини сафарда мағлуб этиб, янги мавсумни муваффақиятли тарзда бошлашди.

Янги мавсум олдидан “Локо” сафига келиб қўшилган ивуарлик ҳимоячи Муҳаммад Коне клуб матбуот хизматига “Машъал”га қарши баҳс ҳамда ОЧЛ доирасида ўтган “Ал Аҳли” билан ўйин тўғрисидаги фикрлари билан ўртоқлашди.

– Чемпионлар Лигаси доирасидаги илк уй учрашувимизда ғалаба қозонмасак бўлмасди. Зеро илк турда кутилмаганда Саудия жамоасига имкониятни бой бериб қўйдик. Натижада “Ал Аҳли”га қарши баҳсда ўз ишқибозларимизни ҳафа қила олмасдик. Шукр, ушбу вазифани уддалай олдик ва жамоамиз характер намойиш этган ҳолда Дубай клубини мағлуб этди.

Ушбу ўйиндаги ғалаба бизга Олий лига доирасида ўтган “Машъал”га қарши ўйинда ҳам куч берди, дея оламан. Зеро биз Муборакка амалдаги чемпион сифатида ташриф буюрдик ва анчагина яхши шаклланган жамоани мағлубиятга учратишнинг уддасидан чиқдик. “Машъал” анча тартибли ўйин намойиш этди. Бироқ биз ушбу учрашувда фақат ва фақат 3 очкони кўзлаган ҳолда майдонга чиққан эдик. Бинобарин мамлакат чемпиони ва кубоги соҳиби эканмиз, бошқа жамоаларни хурмат қилган ҳолда ўйнашимиз лозим. Қолаверса, ўз мухлисларимизни ҳар бир ўйинда хушнуд этишга урнишимиз керак бўлади. Улар бизни мавсумдаги илк уй учрашувимизда ажойиб тарзда қўллаб-қувватлашди. Умид қиламанки, мухлисларимиз кейинги  беллашувларда ҳам стадионга келиб жамоамизга шижоат бериб туришади, – дейди маҳоратли ҳимоячи.