"ФИФАнинг ўз мусобақаларини хусусийлаштириш бўйича таклифни қайтариб олиш қарори — бу яхши янгилик. Бироқ бу билан ташкилотни бошқариш муаммоси ҳал бўлди деб ҳисоблаш жиддий хато бўлар эди.
Конфедерациялар, миллий ассоциациялар, лигалар, ўйинчилар ва футбол жараёнининг бошқа иштирокчилари фақат ушбу қарор билан чекланиб қолмаслиги ва масалани ёпиқ деб ҳисобламаслиги керак. Муаммо анча чуқурроқ.
Наҳотки сиёсий аралашувдан сўнг [Фоларин Балогуннинг] қизил карточкаси бекор қилинганини унутган бўлсак? Джанни Инфантинонинг жиддий қоидабузарликлар сабабли чиқиш қилишини талаб қилган АҚШ Конгресси томонидан очилган суриштирувни-чи? ФИФАдаги тарихий коррупция ишлари бўйича айбловларнинг рад этилганини-чи? Жаҳон чемпионати чипталарининг жанжал келтириб чиқарган нархларини-чи? Манфаатдор томонлар билан тўлақонли мулоқот ва келишувларсиз якка тартибда қабул қилинган халқаро календарь, янги турнирлар ва форматлар бўйича қарорларни-чи?
Муаммо ҳеч қачон фақат битта аниқ таклифда бўлмаган. Муаммо — ҳокимиятни бир қўлда тўплайдиган, тийинб туриш тизимини заифлаштирадиган ва қабул қилинаётган қарорлар бевосита таъсир қиладиган томонларнинг таъсирини чеклайдиган бошқарув моделининг ўзидадир.
Шу сабабли, мен Джанни Инфантино ФИФАга раҳбарлик қилишни давом эттирмаслиги керак деб ҳисоблайман. Жаҳон футболига бошқарув тизимини модернизация қиладиган, ташкилотга бўлган ишончни қайтарадиган ва келажакдаги қарорларни бир томонлама мажбурлаб ўтказмасдан, уларнинг спорт, иқтисодий ва ижтимоий оқибатларини дастлаб баҳолаган ҳолда барча иштирокчилар билан биргаликда қабул қиладиган янги раҳбарият керак.
Битта таклифнинг қайтариб олиниши илгари юз берган барча нарсаларни ўчириб ташламайди. Бу шунчаки музтоғнинг учидир", — деб ёзди Тебас Х ижтимоий тармоғидаги саҳифасида.
