Бу ҳақда L'Équipe нашри хабар бермоқда.
Манба берган маълумотларга кўра, ҳуқуқ-тартибот органлари Ламарининг ўзини ҳамда тергов талқинига кўра молиявий транзакцияда шерик сифатида қатнашган бўлиши мумкин бўлган унинг ўғли Килиан Мбаппени расман сўроқ қилишган.
Терговчиларнинг таъкидлашича, Франция миллий терма жамоаси хавфсизлик хизматининг собиқ раҳбари Мохамед Санхаджи футболчининг онасига тўртта кириш визасини тезлаштирилган тартибда олишда ёрдам берган. Ушбу хизмат эвазига "қироллик клуби"нинг юлдузли ҳужумчиси мутасаддининг ҳисоб-рақамига 60,3 минг евро миқдорида маблағ ўтказиб берган.
Қайд этилишича, Санхаджи йирик антикоррупция иши бўйича асосий фигурант сифатида ўтмоқда. Ушбу тергов доирасида француз терговчилари илгари бошқа таниқли футболчиларни, жумладан Франция терма жамоасининг собиқ ярим ҳимоячиси Франк Риберини ҳам сўроқ қилишган эди.
