Табиийки, Колумбия билан ўйин арафасида айрим ҳавотирли муаммолар йўқ эмас. Муҳими улар бартараф этилмоқда. Шу кунларда кўпчиликнинг эътиборида Жалолиддин Машариповнинг ҳолати бўлиб турибди. Бундан ташқари Колумбия билан бўлиб ўтадиган учрашувда иқлим билан боғлиқ қийинчиликлар ҳам борлигини айтиб ўтиш мумкин. Биз шу масала юзасидан ЎФА тиббиёт қўмитаси раҳбари Аброр Пирриевнинг фикрларига қулоқ тутдик.
- Жаҳон чемпионати олдидан Жалолиддин Машариповда юзага келган вазият ҳақида мутахассис сифатида фикрингиз қандай? Диск чурраси бир хафтада пайдо бўлиб қолмайди. Бу нима сабабдан қўзғаган бўлиши мумкин?
- Умуман олганда Жалолиддинда тиззадаги муаммо бироз чўзилди. Жарроҳлик амалиётисиз майдонга қайтиш умидида анчагина вақт ва куч сарфланди. Охир оқибат операция ва ҳаммасини бошидан бошлашга тўғри келди. Сафга қайтиш жараёни эса осон эмас. Бунга узоқ тиббий муолажалар ҳамда сабр ва матонат ила индивидуал машғулотлар орқали эришилади. Жалолиддин бу жараённи анча интенсив тарзда босиб ўтди. Сабаби тушунарли... Интенсив машғулотлар нафақат кўп куч-ғайрат талаб этади, балки ҳаракат-таянч тизимида йиллар давомида йиғилиб қолган муаммоларни ҳам юзага чиқаради. Мазкур қонуниятга кўра мавжуд "грыжа" шу ўринда ўзини намоён этди деб ўйлайман.
- Қисқа муддатли турнирга тайёрланаётганда юкламалар натижасида жароҳатлар бўлиши нормал ҳолатми?
- Одатда мусобақалардан олдин доимо ўқув-машғулот йиғинлари (ЎМЙ) ўтказилади. ЎМЙ эса доимо яхшигина юкламалар ила кечади. Боз устига терма жамоалар йиғинларига турли чемпионатларда, турлича тақвим ила тўп сураётган футболчилар йиғилади. Шунга кўра ҳар футболчи турлича ҳолатда бўлади. Қолаверса, ҳар футболчи ўзига яраша катта-кичик тиббий муаммолар билан келади. Йиғин давомидаги юкламалар сабаб бу муаммолар ўзини билдириши табиий ҳол. Шу боис даво ва реабилитацион муолажалар ЎМЙнинг бир қисми сифатида кўрилади.
- Колумбия билан ўйинимиз денгиз сатхидан 2000 метр баландликда ўтади. Мазкур омил қаршилигини енгиб ўтишимиз нималарга боғлиқ?
- Бундай баландликда босим нисбатан паст бўлгани боис футболчи организми кислород танқислигини ҳис этади. Ўйинга учиб борувчи жамоа бундай шароитга мослашишга улгурмайди, фақат унинг салбий томонларини камайтиришга интилиш қолади, холос. Айнан шу ўринда футболчи қонидаги кислород ташувчилар: эритроцит ва гемоглабин юқори бўлиши жуда муҳим. Бунинг учун йиғин давомидаги витаминизация схемасига зарур витаминлар ва темир элементи қўшилади. Яна суюқлик, турли микроэлемент ва тузли эритмалар - "изотоник"лар ичишни кўпайтириш керак. Чунки иссиқ ҳаводан ташқари бундай баландликда пульс ортади ва нафас олиш жуда тезлашади, организм кўп суюқлик йўқотади. Шунингдек, овқатланиш рационини углеводларни кўпайтириш ҳисобига ўзгартириш керак ҳамда етарли дам ва тикланиш жараёнлари жуда муҳим. Бу айтилган омиллар жамоамизнинг мураббийлар ва тиббий штаби томонидан инобатга олинган ва тайёргарлик даврида зарур чора-тадбирлар амалга оширилди.
- Каннавронинг тиббий штабига қандай баҳо берасиз? Терма жамоалар марказида бўлган вақтда италиялик мутахассислар билан гаплашиб кўрдингизми?
- Нафақат гаплашиш, балки тиббий жараёндан мудом хабардорман ва айрим ўринларда иштирок этаман. Чунки маҳаллий йиғинлар давомида барча тиббий муолажалар МФМ даги тиббий марказимизда олиб борилади. Шунингдек, тайёргарлик даврида футболчилар гуруҳ ва якка тартибда бир неча бор чуқурлаштирилган тиббий кўрикдан ўтказилдилар. Тиббий штаб борасида шуни айтишим мумкин-ки, бош мураббий ўзининг тиббий штабини топ жамоалар даражасидаги кўринишга олиб келишга ҳаракат қилди. Яъни умумлашган шифокор концепцияси эмас, балки тиббий йўналишлар бўйича жароҳатларга, физиотерапевтик муолажаларга, реабилитацияга, овқатланиш рационига жавоб берувчи алоҳида мутахассислар жамланмасига интилмоқда. Бугунга келиб тиббий штабда профессионаллар жамланган ва уларнинг жамоадаги ўрни ва хизмати жуда муҳим.
