Камолиддин Мурзоев: "Андижон"да тарих ёзишга имкон бор. "Насаф"га қарши беллашув очиқ ва голларга бой бўлади"

Ўтмишда бир неча етакчи жамоалар сафида тўп тепган, ҳозирда Футболчилар уюшмасини бошқараётган Камолиддин Мурзоев эртанги "Насаф" – "Андижон" учрашувга муносабатини билдирди.

"Ўйлайманки, “Андижон”да тарих ёзиш имконияти бор. Эртага очиқ ва муросасиз беллашув бўлади. Мухлисларга манзур тушадиган ўйин кутмоқдаман. Мағлубиятлар сериясига тушиб қолган бўлса-да, "Андижон" сўнгги турда муҳим ғалабани қўлга киритди. Бу жамоага руҳий мадад бўлиб хизмат қилади.

"Насаф" эса амалдаги чемпион сифатида ўз салоҳиятини яна бир бор исботлаш учун майдонга чиқади. Аммо айни пайтда жамоаларнинг чемпионатдаги ҳолати ёки жадвалдаги ўрни бу учрашувда ҳал қилувчи аҳамиятга эга бўлмайди. Футбол – бу бир ўйинлик кураш, унда ҳар қандай имконият юзага чиқиши мумкин.

Шу сабабли голларга бой, шиддатли ва драматик қарама-қаршилик гувоҳи бўлишимиз эҳтимоли катта", – деди Камолиддин Мурзоев.

Эслатиб ўтамиз, Суперкубок беллашуви эртага "Бунёдкор" стадионида 19:30 да бошланади.