Аввалроқ мадридликлар ушбу ишга оид далиллар ва гувоҳликларни ўз ичига олган, ҳажми қарийб 50 минг саҳифадан иборат ҳужжатлар тўпламини УЕФАга тақдим этгани ҳақида хабар берилганди.
Лапортанинг таъкидлашича, "Барселона"ни суд жараёни якунланмасидан олдин айбдор деб кўрсатишга уринишлар бўлган. У клубнинг оқланишига ишонч билдириб, "Реал"ни каталонияликлар обрўсига путур етказишга ҳаракат қилаётганликда айблади.
"Негрейра иши ҳақида гап кетганда, такрорлашдан чарчамайман: бизни суд бўлмасидан олдинёқ айбдор деб топишга ҳаракат қилишди. Ваҳоланки, бизни айблаш учун асос йўқлиги маълум бўлди. "Барселона"нинг оқланишига тўлиқ ишонаман.
Бу мавзуни доимий равишда кўтариб келаётганлар клубимизнинг обрўсига путур етказишга ва унинг имижини булғашга уринмоқда. Ҳукм чиқарилганида бу ҳақда гаплашиш учун вақт бўлади. Улар фақат "Барселона"ни обрўсизлантириш мақсадида можаро оловини ёқишда давом этмоқда.
"Реал" футболга зарар етказиш учун шундай қилмоқда. Улар ҳамма нарсага қарши чиқади. Сен УЕФА ёки лигага мурожаат қилишни хоҳласанг, улар барча таклиф ва ташаббусларга қарши бўлади. Бу миллий ва халқаро миқёсда ўз нуфузи, эътирофи ва обрўсини йўқотиб бораётган клуб ҳақида кўп нарсани айтади.
Бунга мисол сифатида EFC конгрессида иштирок этганимни келтиришим мумкин. "Реал"нинг эса у ерда ҳатто вакили ҳам йўқ эди. Улар ўзларини жуда кибрли ва ҳукмронликка интилувчи тарзда тутишади. Нима қилаётганларини яхши билишади, аммо бу уларга бўлган ишончнинг жиддий пасайишига олиб келмоқда.
Европа Суперлигаси масаласида ҳам худди шундай бўлди: охир-оқибат улар бошқалар билан бирга қолади, аммо бу йўлда барчага тўсиқ қўйишга ҳаракат қилади. Менимча, бу борада ўз хатти-ҳаракатларини танқидий баҳолашлари керак. Бундай йўл тутиш муносиб эмас", - деди Лапорта.
