Championat.asia сайти талқинига кўра, 8-турнинг энг яхши дарвозабони — Ўткир Юсупов
“Навбаҳор” якунига етган турда “Локомотив” билан баҳс юритиб, 2:0 ҳисобида муваффақият қозонди. Бу ғалабада Ўзбекистон терма жамоаси асосий посбони Ўткир Юсуповнинг ҳиссаси катта бўлди. У баҳсда нақд 7 та сэйв амалга оширди, шунингдек, жамоасини муқаррар голдан сақлаб қолган ҳолат ҳам кузатилди. Шундай қилиб, Championat.asia сайти айнан Ўткир Юсуповни тур дарвозабони номига лойиқ кўрди.
Championat.asia сайти талқинида 8-турнинг энг яхши мураббийи — Илёс Зейтуллаев (“Бунёдкор”)
“Бунёдкор” бу турда Зоминда “Сўғдиёна” билан тўқнаш келиб, 3:2 ҳисобидаги ғалабани тантана қилди. “Қалдирғочлар” дастлаб 0:2 ҳисобида ортда бораётганига қарамай, ўйин тизгинини ўзи томонга оғдира олди. Шу тариқа, чиройли ўйин ва муносиб жанг эвазига ғалабани қўлга киритган мураббий Championat.asia сайти томонидан тур мураббийи деб топилди.
Championat.asia сайти талқинига кўра, 8-турнинг энг яхши футболчиси — Билолхон Тошмирзаев (“Бунёдкор”)
Юқорида ёзиб ўтганимиздек, “Бунёдкор” бу турда сафарда “Сўғдиёна”дан устун келди. Учрашув Билолхон Тошмирзаевнинг бенифисига айланиб кетди. 28 ёшли вингер фаолиятидаги энг ёрқин ўйинларидан бирини ўтказиб, хет-трикни расмийлаштирди. Championat.asia ижодкорлари сўзсиз айнан уни тур футболчиси дея эътироф этди.
Championat.asia сайти талқинида 8-турнинг энг чиройли голи муаллифи — Билолхон Тошмирзаев (“Бунёдкор”)
8-турнинг энг яхши футболчиси Билолхон Тошмирзаев тур голига ҳам муаллифлик қилди. Урилган голда чиройдан кўра амалга оширилган комбинация муҳим аҳамият касб этди. Ўзбек футболида бундай голлар камдан кам учрайди — кетма-кет аниқ паслар ва муваффақиятли якун. Яна бир муҳим жиҳат шундаки, бу гол жамоага якунда ғалаба келтирди (3:2). Championat.asia сайти ортиқча муҳокамаларсиз Билолхон Тошмирзаевни 8-турнинг энг чиройли голи муаллифи деб топди.
