"Аламли мағлубиятга учрадик. Мухлисларимиздан узр сўрайман. Ўйинга бироз бошқача режа тузгандик. Биринчи бўлимда ҳисобни ушлаб туриб, танаффусдан сўнг янги кучлар билан олдинга борамиз деб. Бурчак тўпидан гол ўтказиб юбордик ва барчаси бузилиб кетди. Дарров иккинчи голни ўтказдик. Кейин эса ўзимизга кела олмадик. Кўп вазиятларда майдон марказини рақибга бериб қўйдик. Иккинчи бўлимда янги футболчиларни майдонга тушириб, ўйинни ўзгартирмоқчи эдик. Лекин четлатиш режамизни амалга оширмади", - дея гап бошлади Ислом Аҳмедов.
- Қизил карточкани айтиб ўтдингиз. "Андижон" қизил карточкага қарамай, ҳужумчи бўлган Боакье майдонга тушмоқда. Сизнинг жамоангизга бироз баланс етишмаётгандек. Ҳужумга кўпроқ урғу берилаётгандек. Нейтрал мухлислар учун бу зўр, аммо жамоангизнинг салбий натижалари айнан баланс етишмовчилиги учундек гўё...
- Тўғри, ҳисоб 0:0 бўлиб турганда ҳимоячини майдонга тушириш ва натижани сақлаб қолишимиз мумкин эди. Лекин биз 0:2 ҳисобида ортда бораётган эдик. Ҳужумга ўтмасак бўлмасди. Шунинг учун таваккалчиликка қўл урдик...
- Тўғри, аммо "Пахтакор" билан бўлган ўтган ўйинда ҳам Чаласан ўрнига ҳужумкор ўйинчини майдонга туширган эдингиз. Сиз фақат ҳужум ҳақида ўйлаётгандек. Биз мухлислар учун бу шунчаки ажойиб.
- У учрашувда Андроникашвили бор эди. У сўнгги ҳимоячи позициясида ўйнай олади. Уни марказий ҳимояга ўтказиб, олдинга футболчи қўйган эдик. Бугун ютқазаётганимиз учун ҳужумга урғу бердик. 0:2 ютқазамизми ёки 0:3 фарқи йўқ.
- Бугун майдонда Потапов эмас, Адҳамов бўлганида қизил карточка билан боғлиқ бўлган вазият бошқача якун топиши мумкин эдими?
- Дарвозабонлар мураббийи билан маслаҳатлашаман. Сўнгги ўйинда Потапов яхши ўйнади. Яхши ўйнаб турган дарвозабонни ўзгартириш нотўғри бўларди.
- Драган Черан нега бугун ўйнамади?
- Режамиз бўйича Драган иккинчи бўлимда майдонга тушиб, ўйинни кучайтириши керак эди. Қизил карточка эса режаларимизни ўзгартиришга мажбур қилди. Беҳзод Сулаймонов ҳимоячи сифатида ҳам ўйнай олгани учун уни майдонга туширдик.
- Бабаян фақатгина йирик жамоаларга мағлуб бўлганди. Ислом Аҳмедов эса кўпинча ўртамиёна жамоаларга қарши яхши натижа қайд этмоқда. Ислом Аҳмедов "эффекти" катта жамоаларга таъсир қилмайдими? Катта жамоаларни мағлуб эта олмайдими?
- Биринчи даврада "Бунёдкор"га қарши ўйнаганимизда "қалдирғочлар" учинчи ўринда кетаётган эди. Биринчи даврадаги "гранд" жамоаларга қарши ўйинимизни солиштирсак, иккинчи даврадаги ўйин сифати яхшироқ. Тўғри, натижа бўйича мағлуб бўлдик. Лекин ҳозир ҳужум қиляпмиз. Мағлубият билан мағлубиятнинг фарқи бор. Ҳозир кўпроқ ҳужум қиляпмиз. Ўзимизнинг хатолардан сўнг гол ўтказиб юборяпмиз. "Нефтчи"га қарши ўйинда четлатишга қадар яхши ўйнаб тургандик.
- Биринчи даврага нисбатан жамоа анча тезкор бўлди. Ҳозирги "Андижон"да "яширин қурол" борми? Масалан, Хомяков даврида жамоа "осмон қироли" эди...
- Бизда бўйи баланд ўйинчилар кўп эмас. Драган ва Мартин бор. Драган анча орқада ўйнаяпти. Бизнинг футболчиларимиз тўпни яхши назорат қила олади. Устунлигимиз шу. Бор таркибимиздан келиб чиқиб, тўпни ерда ушлаб, кесувчи паслар орқали ўйнаяпмиз. Бурчак зарбалардан ҳам гол урдик, лекин ҳар доим стандарт вазиятлардан гол урмаяпмиз. Стандарт вазиятларга эга, тўпни назорат қилишга кўпроқ эътибор беряпмиз.
- Потапов ўртамиёна жамоаларга қарши яхши ўйнаётгандек. Адҳамовни асосий таркибга қўйиш тўғри қарор бўлмасмиди...
- Олдиндан нима бўлишини билганимизда шундай қарор қилардик. Режамиз бугун иш бермади. Аниқроғи, режамиз бузилиб кетди. Кутилмаганда ўйин стартида иккита гол ўтказдик. Кейин эса четлатиш. Олдиндан билганимизда бошқача йўл тутардик.
- Драган Черан сўнгги учрашувларда кам ўйин амалиётига эга бўлмоқда. Гап-сўзларга қараганда Черан мураббийлар штаби билан келишмовчиликка борган. Бугун эса у захирада қолди.
- Йўқ. Орамизда келишмовчилик йўқ. Драган сўнгги ўйинларда иккинчи бўлимда майдонга тушиб, ўйинни кучайтиряпти. У майдонга тушиб, тўпни назорат қиляпти. Рақиблар чарчаган ҳолатда эса бўш зоналар топаётган эди. Ўйиндан олдин ҳар доим Черан билан гаплашамиз. Бугунги режамиз эса четлатиш туфайли иш бермади. Драган майдонга тушмаганидан сўнг кайфияти бироз тушди.
- Неча мавсумлар давомида энг яхши тўпурар бўлиб келган Черан ҳозирги бажараётган ролига кўняптими? Ҳар бир футболчининг "эго"си бўлади. Айниқса Черандек катта футболчининг.
- Йўқ. Биз Драган билан гаплашганмиз. У ўзи иккинчи бўлимда рақиб чарчаганида майдонга тушса яхшироқ бўлишини айтган. Бундай таклиф ўзидан чиққан. Машғулотлардаги ҳаракатига кўра у асосий таркибда ҳам ўйнай олади. Лекин уни иккинчи бўлимда майдонга туширишимизни сўрайди.
