Бунда "Андижон" бош мураббийи Ислом Аҳмедов иштирок этди.
- Ўйин ҳақида фикрингиз?
- Кутилганидек ўйин қийин кечди. Бугун Ўзбекистоннинг энг яхши жамоаларидан бирига қарши баҳс олиб бордик. "Насаф"да бир-икки футболчи ўйнамаса ҳам жамоа ўзини йўқотиб қўймайди ва ишлаб турган механизмга ўхшайди. Футболчиларимиз дастлабки 30 дақиқаликни яхши ўтказишди. Лекин шундан кейин озгина устунликни рақибга топшириб қўйидик. Иккинчи таймда эътиборсизлик сабаб гол ўтказдик. Умуман олганда жамоамиз ўйинидан қониқдим. Баҳсни такрорни кўриб хатоларни таҳлил қиламиз. Ҳар бир ўйин биз учун тажриба бўляпти.
- Аввалги учрашувларда захирадан тушганлар анча фаол ҳаракат қилганди. Лекин бугунги ўйинда шуни кўрмадик. Футболчиларда чарчоқ аломати борми?
- Балки шунақадир. Лекин мен захирадан тушганлар ёмон ҳаракат қилишди дея олмайман. Қайтанга улар ўйинни кучайтирди ва биз кўпроқ ҳужумга ўтдик. Жамоамиз ўйинидан кўнглимиз тўлди. Қаердадир омад келмади. Вазиятлар яратдик, лекин гол ура олмадик. Муҳими, ҳужум қиляпмиз.
- Жамоа ҳар ўйинда ротация қиляпти.
- Бу орақали ички рақобатни кучайтирамиз. Машғулотларда ҳаммани кузатяпмиз ва ким тайёр бўлса ўйинга қўйяпмиз. Шунингдек рақибдан келиб чиққан ҳолда услуб танлаяпмиз ва шу услубга кўра, футболчиларни танлаб оляпмиз.
- Жамоангиз охирги турда "Ҳавоқанд" билан баҳс олиб боради. Бу ўйинда ёшларга имконият берасизми?
- Қўлдан келганча ёшларга имкон берамиз. Лекин футболда рақибга енгил қараш керак эмас. Ҳозир гуруҳимизда қизиқ вазият юзага келган ва учта жамоада кейинги босқичга чиқиш имконияти бор. Биз ҳам бу имкониятни қўлдан чиқармаймиз деб умид қиламан.
