Бунда "Ҳавоқанд" бош мураббийи Самандар Мелибоев иштирок этди.
- Ўйин ҳақида фикрингиз?
- Авваламбор Ўзбекистон туманида жойлашган ушбу стадионда ўйин олиб боришимизга ёрдам бериб келаётган мутасаддиларга катта раҳмат айтмоқчиман. Бугунги ўйинга алоҳида ҳозирлик кўрдик. Биринчи турдаги мағлубиятдан тўғри хулоса чиқаришга ҳаракат қилдик. Ўтган учрашувга нисбатан анча яхши ўйин кўрсатдик деб ўйлайман. Йигитлар вазиятни қўлга олишга ҳаракат қилишди. Барибир "Шўртан" билан орамиздаги фарқ сезилди. Айниқса жисмоний тарафдан кучсиз эканимиз кўриниб қолди. "Шўртан" жамоасини ғалаба билан табриклайман.
- Ўтган тур Суперлига, бу тур Пролига жамоаси билан ўйнадингиз? Орадаги фарқ сезилдими?
- Футболчилар ўртасида тенглашиш бор. Лекин жамоа сифатида оладиган бўлсак, футболга ёндашув бўйича фарқ кўринади. Суперлигада бошқача, Пролигада бошқача ёндашилади. Биринчи лига жамоалари Пролига жамоалари билан рақобатлаша олади. Фақат бу ўринда футболчиларнинг ўз устиларида янада кўпроқ ишлашига тўғри келади. Англияда Лигалар ўртасида фарқ бўлгани билан Кубок баҳсларида ҳамма тенгма-тенг ўйнашга ҳаракат қилади. Ўзбекистон Кубогида Биринчи лигадан учта жамоа қатнашяпти, буни ҳам катта натижа деса бўлади. Кубок ўйинлари орқали тажриба тўплаяпмиз ва бу келажакда асқотади.
- "Ҳавоқанд" жамоаси ҳақида тўхталиб ўтсангиз. Ҳаваскор жамоадан мана секинлик билан профессионал клубга айланяпти.
- Жамоамиз ташкил этилганига тўртинчи йил кетяпти. Таркибимизда асосан маҳаллий ёшлар ва ҳаваскор футболчилар ўйнаяпти. Асосий эътиборни ёшлар тарбиясига қаратганмиз. Биз аввало ўз тизимимизни йўлга қўйиб олишимиз лозим. Шароитни ҳам яхшилаб боришга ҳаракат қиляпмиз. Келажакда яхши футболчиларни чиқарсак бундан жуда хурсанд бўламиз.
