"Арал" жамоаси бу мавсумда Пролигада етакчиликни ўз қўлига олган. Бунда, албатта, Руслан Қалмағамбетовнинг ҳам ҳиссаси катта бўляпти. У бу мавсум чемпионат доирасида ўз ҳисобига 14 та гол ёздириб қўйишга муваффақ бўлди. Биз бу борада Русланнинг фикрлари билан қизиқдик.
— Футболчи катта жамоага келгунига қадар кўп йўллардан ўтади. Сизда бу босқичгача қандай қийинчиликлар бўлган?
— Ҳар бир футболчининг ортида машаққатли йўл бўлади. Мен ҳам ёшлигимдан бери шу йўлни танлаб, футбол ўйнаб келяпман. Ҳар бир спортчида ўзига яраша қийинчиликлар бўлади, деб ўйлайман.
— Қорақалпоғистон футболидаги ижобий ўзгаришлар, “Арал”нинг Суперлигага интилаётгани ўсишингизга қанчалик таъсир қиляпти?
— Албатта, бу жуда катта мотивация беради. Қорақалпоғистон футболи ривожланаётгани барча футболчилар учун яхши имконият. “Арал”нинг олдига қўйилган катта мақсад биздан янада кўпроқ меҳнат ва масъулият талаб қилади.
— Сизнинг салоҳиятингизни биринчи бўлиб кўриб, тўғри йўл кўрсатган мураббий ким?
— Илк мураббийим — Жалғасов Серик. Унга катта раҳмат айтаман. Ва, албатта, бугунги кундаги бош мураббийимиз Неъматилла Қутибоевга ҳам миннатдорчилик билдираман. Ҳозирги пайтда у менга тўғри йўл кўрсатиб келмоқда.
— Бу йилги фаолиятингиздаги ўсиш ва бурилишга нима сабаб бўляпти? Мураббий ишончими ёки жамоадошлар?
— Бу, аввало, мураббийларнинг менга билдирган ишончи, жамоадошларимнинг қўллаб-қувватлаши ва, албатта, ўзимнинг олдимга қўйган мақсадларим сари интилишим маҳсули, деб ўйлайман.
— Вазиятни ҳис қилишингиз, голни сезишингиз ниманинг маҳсули?
— Бу, аввало, ўзимга бўлган ишончнинг юқорилаб бораётганидан, деб ўйлайман. Ҳар бир голдан кейин ўзимга бўлган ишончим ортяпти.
— Неъматилла Қутибоев билан ишлаш жараёнида қайси маслаҳати сизни ўзгартирди?
— Устознинг энг муҳим маслаҳати: "Майдонда доимо ўзингга ишониб ҳаракат қил ва олдинга ўйна", деган гаплари бўлган. Бу борада кўп маслаҳатлар берганлар.
— Рақиб ҳимоячиларининг сизга босим ўтказиши ва агрессив ўйнашига қандай жавоб қайтаряпсиз? Тактик ва руҳий жиҳатдан.
— Бу — футболнинг бир қисми. Мен хотиржамликни сақлашга ҳаракат қиламан. Эмоцияга берилмасдан, жамоам учун энг тўғри қарорни қабул қилишга интиламан.
— Майдонга кучли бўлиб чиқиш, омадсизликдан кейин тикланиш учун қандай омилларга таянасиз?
— Ҳар бир омадсизликдан хулоса чиқараман. Оиламнинг дуоси ва қўллаб-қувватлаши, мураббийларнинг ишончи ҳамда Аллоҳга таваккал қилиш менга куч беради.
— Руслан Қалмағамбетов майдон ташқарисида қандай инсон?
— Майдон ташқарисида оддий, хотиржам инсонман. Бўш вақтимни оилам билан ўтказишни яхши кўраман. Доимо ўзимни ривожлантиришга ҳаракат қиламан.
— Жаҳон футболидан қайси футболчининг услуби, ҳаракати ва хислатларини ўзингиз учун идеал ва кумир деб биласиз?
— Менга Криштиану Роналдунинг меҳнатсеварлиги, интизоми ва ғалабага бўлган чанқоқлиги ёқади. Унинг профессионаллиги ҳар бир футболчи учун намуна, деб ўйлайман.
Бекзод Сувонқулов суҳбатлашди
