Championat.asia сайти турнинг энг яхшиларини аниқлади.
Тур мураббийи — Азамат Шарипов (“БухДУ”)
“БухДУ” бу турда “Яйпан”ни меҳмон қилиб, 2:1 ҳисобида ғалаба қозонди. Бухороликлар мазкур баҳсда мураббийнинг кўрсатмаларига амал қилган ҳолда ўзининг энг яхши томонларини кўрсатди ва мавсумдаги илк ғалабасига эришди. Шу тариқа, айнан жамоа устози Азамат Шарипов тур мураббийи сифатида эътироф этилди.
Тур футболчиси — Асилбек Алиев (Республика ФА)
Республика ФА “ТерДУ” билан баҳс юритиб, 4:2 ҳисобида ғалаба қозонди. Мазкур ўйин ҳужумчи Асилбек Алиевнинг бенифисига айланиб кетди ва у хет-трик қайд этди. Шундай қилиб, айнан Алиев сўзсиз тур футболчисига айланди.
Тур дарвозабони — Хожамберди Шоназаров (“ҚМУ Жайхун”)
“ҚМУ Жайхун” ортда қолган турда “Ғазалкент” меҳмони бўлиб, дуранг ўйнади (0:0). Учрашув мобайнида Хожамберди Шоназаров бир қатор сэйвлари билан ажралиб турди. Айниқса, у сўнгги дақиқаларда ажойиб сэйв кўрсатиб, жамоасини муқаррар голдан асради. Шундай қилиб, 27 ёшли футболчи тур дарвозабони номига лойиқ кўрилди.
Тур голи — Руслан Қалмағамбетов (“Арал”)
“Арал” бу турда “Пахтакор фарм”ни йирик ҳисобда таслим қилди (3:0). Мазкур баҳснинг 10-дақиқасида мезбонлар тўпурари Руслан Қалмағамбетов тўпни дарвозабонинг устидан ошириб қўйиш орқали ҳисобни ошди. Чиройли киритилган ушбу тўп Championat.asia ходимлари томонидан тур голи деб топилди.
Эслатиб ўтамиз, тур доирасидаги “Олимпик-MobiUz” – “Лочин” баҳси 18 июль куни бўлиб ўтади.
