Ўтган ҳафта ФИФА жаҳон чемпионати ҳуқуқларини хусусий инвесторларга сотиш учун янги тижорий тузилма — FIFA Forward Enterprise (FFE) яратмоқчи экани маълум бўлган эди. Кейинчалик Инфантино футбол конфедерациялари танқиди ва УЕФАга аъзо давлатлар томонидан ЖЧни бойкот қилиш таҳдиди фонвида бу ғоядан воз кечишга қарор қилди.
"Мен ФИФА муаммолари ҳақида 10 000 сўз ёзишим мумкин эди. Лекин ечим атиги учта банддан иборат: Инфантино кетиши керак. Мен бутун ҳаётим давомида футболни севганман. Мен 20 йил давомида профессионал ўйинчи бўлганман. Ишонинг, карьерам давомида кўплаб нопок одамларни учратганман. Лекин сўнгги 10 кун ичида кўрганим — бу мен шу вақтгача кузатган энг паст, энг ёлғончи ва қўрқоқларча манфаатпараст хатти-ҳаракатдир. Бундай ишга қўл ура оладиган одам — фақат ўзи ва дўстларини бойитиш мақсадида шундай улкан ўзгаришларни ўтказишга уринаётган шахс футболнинг ўтмиш сарқити ҳисобланади ва унга футбол келажагида ўрин йўқ. Агар бу шунчалик яхши ғоя бўлса, нега жаҳон чемпионати финали олдидан бир хонага тўпланганингизда бу ҳақда ташкилотингиз аъзоларига гапириб бермадингиз? Агар бу шунчалик пухта ўйланган режа бўлган бўлса, нега уларнинг хавфлари ҳамда сиз устунлик деб атаётган жиҳатлари ҳақида гапириб бермадингиз? Агар бу схема аниқ-равшан бўлганида, нега охир-оқибат йилига 30 миллион доллар маош оладиган ишга эга бўлишингизни очиқчасига айтмадингиз? Лекин буларнинг ҳеч бири қилинмади. Чунки бу ёмон ғоя. Хусусий инвестиция фондлари ҳар доим интиладиган вайронкор фойда ҳақидаги маълумотларни ошкор қилмасангиз, бу ишончли ғоя эмас. Улушингизни сотганингиздан кейин у бутунлай йўқолиб кетишини ва ворисларингизни Жаҳон кубогига эгалик қилиш ҳуқуқидан маҳрум қилишингизни тушунтирмасангиз, бу жасур ғоя эмас. Ва ниҳоят, Жаҳон кубогини Вашингтондаги дўстларингизга ликопчада тутқазганингиздан кейин улар сизга ҳозирги маошингиздан беш баробар кўп даромад таъминлайдиган иш беришини тилга олмасангиз, бу ноҳақликдир", – деб ёзди Фигу ўз колоннасида.
