Даврон Файзиев: “Ўз олдимизга қўйган вазифани бажаришга ҳаракат қиламиз”
18 май 2017 22:33
Янгиликлар

Даврон Файзиев: “Ўз олдимизга қўйган вазифани бажаришга ҳаракат қиламиз”

Олий лиганинг 11-турида Жиззахнинг “Сўғдиёна” жамоаси ўз майдонида “Шўртан” ни қабул қилди ва 1:0 ҳисобида ғалабага эришди.

Ўйиндан сўнг “Сўғдиёна” бош мураббийи Даврон Файзиев матбуот анжуманига қатнашди.

- Бугунги рақибимиз жуда жиддий эди. Ушбу жамоа “Локомотив”, “Бунёдкор”, “Пахтакор” каби жамоаларни мағлубиятга учратган. Бугунги учрашув оғир ўтишини билар эдим. Кўрсатмалар бераётганимда бу ҳақида йигитларга айтган эдим. Бир томонлама бугунги ғалабадан хурсандман. Иккинчи томондан йигитларимизда уй ўйинларида кучли ҳаяжон сезилаяпти. Бугунги ўйинда биз бир нечта вазиятлардан фойдалана олмадик. Яхшиямки, стандарт вазиятдан унумли фойдалана олдик.

Олдимизда кубок баҳслари турибди. “Бухоро” жамоаси билан кубок ўйини ва сафарда “Пахтакор” билан ўйинимиз бор. Бу ўйинларга жиддий тайёргарлик кўрамиз ва ўйлайманки, ўз олдимизга қўйган вазифани бажаришга ҳаракат қиламиз”-дейди бош мураббий Даврон Файзиев.

“Сўғдиёна” матбуот хизмати