As хабарига кўра, "кўк-анорранглилар" кетма-кет учинчи йил зарар қайд этмоқда. 1,06 млрд евролик тушумга қарамай, клуб 18 миллион евро зарарга кирди. Келаётган шанба куни, 19 сентябрда, клуб аъзолари умумий йиғилишда молиявий ҳисоботни тасдиқлашлари керак бўлади.
"Барса" ўтган йилдагидек, зарарлар бартараф этилганини таъкидламоқда, чунки мунтазам даромадлар фойдани кўрсатмоқда, аммо фавқулодда харажат моддалари молиявий кўрсаткичларни пасайтиришда давом этмоқда.
Асосий муаммо Barça Productions (клуб билан боғлиқ барча аудиовизуал, рақамли ва кўнгилочар контентни яратиш, тарқатиш ва тижоратлаштириш учун тўлиқ жавобгар бўлган шўъба медиакомпанияси) қийматини пасайтириш зарурлигидадир. Якунланган молиявий йилда унинг қийматини 23 миллион еврога камайтиришга тўғри келди, натижада умумий қиймат 116 млн еврони ташкил этди.
2023/24 йилги мавсум учун молиявий ҳисоботда аудитор клубдан ўша пайтда Barça Vision деб аталган медиакомпания инвесторлари олдидаги қарздорликни узиш учун 141 млн евро миқдорида заҳира яратишни талаб қилган эди. Ўшанда "Барса" ушбу активни 408 млн еврога баҳолаган эди. Кейинги мавсумда каталонияликлар ўз улушлари сабабли Barça Productions қийматини янада камайтиришди — 90 млн еврога ва умумий қийматни 178 млн еврога етказишди. Ҳозирда "Барселона"нинг компаниядаги улуши 63 фоизни ташкил этади. Ушбу муаммонинг ечими ёки Barça Productions қийматини ошириш, ёки янги инвесторларни жалб қилиш бўлиши мумкин, аммо бунинг эҳтимоли кам. Унгача "Барселона" актив қийматини босқичма-босқич пасайтиришга мажбур бўлади.
