Tojikiston futzal terma jamoasi bosh murabbiyi: "Juda qiyin guruhdan joy oldik, ammo vatanimiz shani uchun munosib kurashamiz"

- Tojikiston terma jamoasining Jahon chempionatiga tayyorgarligi qanday o'tdi?

- Uch bosqichli tayyorgarlik jarayonini o'tkazdik. Dastlab, Toshkentda "Mirabror Usmonov xotira turniri"da ishtirok etdik. Ikkinchi bosqichni esa, Qozog'istonning Astana shahrida o'tkazdik va Qozog'iston terma jamoasi bilan ikkita o'rtoqlik o'yinini o'tkazdik. So'nggi bosqichda esa, Dushanbeda Niderlandiya va Ispaniyaga qarshi o'ynadik. Jamoa qanday holatda ekanligini 1-turdan keyin bilib olamiz.

- Dastlabki raqib Marokash terma jamoasini o'rganib chiqdingizmi?

- Raqibimiz juda kuchli ekanligini bilamiz. Marokash so'nggi yillarda "fantastik" o'yin namoyish etmoqda. Jamoa 2021 yildan buyon bor-yo'g'i bir marotaba mag'lubiyatga uchradi. Birinchi uchrashuv juda muhim. Biz o'z tariximizda birinchi marotaba Jahon chempionatida ishtirok etyapmiz. Birinchi turda munosib o'yin namoyish etishga harakat qilamiz.

- Guruhdagi qolgan raqiblar haqida gapirib o'tsangiz?

- Juda-juda qiyin guruhdan joy oldik. Panama - Konkakaf g'olibi, Marokash - Afrika chempioni va Portugaliya Jahon chempioni. Bunday guruhda faqatgina kurashish kerak. Vatanimiz shani uchun munosib o'yin ko'rsatishimiz kerak.

Abdulvosit Bektemirov suhbatlashdi

Eslatib o'tamiz, Tojikiston terma jamoasi birinchi tur uchrashuvini Marokashga qarshi o'tkazadi. Uchrashuv 16 sentyabr kuni, soat 20:00da "Humo Arena"da o'tkaziladi.