Superliga. Bugun Qo'qon, Muborak va Toshkentda o'yinlar bor

"Mashal" – "Qizilqum"
14 mart 2020 yil. Muborak. Bahrom Vafoev nomidagi stadion. 16:00
Hakamlar: Rustam Lutfullin, Husniddin SHodmonov, Aleksandr Burov, Ilya Ilin
Nazoratchi: G'ayrat Karimov
Komissar: SHoxruh Said

Superligaga qaytgan "Mashal" bu tur Muborakda mavsumni ketma-ket ikkita mag'lubiyat bilan boshlagan "Qizilqum"ni qabul qiladi.

SHu kunga qadar mazkur jamoalar O'zbekiston chempionatida 30ta o'yinda to'qnash kelishgan. Natijalar mutlaqo teng. Ikki jamoa ham 9tadan bahsda g'olib bo'lgan va 12ta uchrashuvda durang qayd etilgan.

Bu jamoalarning so'ngi o'zaro o'yinlari 2017 yilda kuzatilgan. O'shanda "Qizilqum" uyida o'tgan uchrashuvda mezbonlar 2:0 hisobida zafar quchishgan, Muborakda esa "Mashal" ortig'i bilan revansh olgan - 4:0.

"Qo'qon-1912" – "So'g'diyona"
14 mart 2020 yil. Qo'qon. "Markaziy" stadioni. 16:00
Hakamlar: Zokir Qodirov, Ruslan Samandarov, Obid Jumaev, SHavkat Nasibullaev
Nazoratchi: Konstantin Smirnov
Komissar: Zohir Akramhonov

Baxtiyor Ashurmatov boshchiligidagi "Qo'qon-1912" o'z maydonida Ulug'bek Baqoev boshchiligidagi "So'g'diyona"ni qabul qiladi.

Bu jamoalar hozirga qadar 28ta o'yin o'tkazishgan. 13ta bahsda "So'g'diyona" g'olib bo'lgan. 8ta uchrashuvda "Qo'qon-1912"ning qo'li baland kelgan. Qolgan 7ta o'yinda durang kuzatilgan. "So'g'diyona" 44ta gol urgan va 33ta gol o'tkazgan.

2019 yilgi mavsumda Jizzaxda 2:2 hisobi qayd etilgandi. Qo'qonda esa "So'g'diyona" 2:1 hisobida zafar quchgan.

Oxirgi to'rtta o'zaro o'yinda "Qo'qon-1912" bu jamoaga umuman mag'lub bo'lmay kelmoqda - 2 g'alaba va 2 durang.

2017-2018 yillarda Ashurmatov va Baqoev birgalikda "Buxoro"da ishlashgan.

"Paxtakor" – "Metallurg"
14 mart 2020 yil. Toshkent. "Paxtakor" stadioni. 18:15
Hakamlar: Jasur Muxtorov, Sanjar SHoyusupov, Alisher Usmonov, G'ayrat Jo'raev
Nazoratchi: Farhod Abdullaev
Komissar: Sardor Qudratullaev

Bu mavsum mag'lubiyatga uchramagan ikki klub o'rtasidagi bahs.

Ushbu klublar o'rtasidagi 46ta o'yinning 38tasida poytaxt klubi g'olib bo'lgan. 4ta uchrashuvda Bekobod klubi zafar quchgan bo'lsa yana 4ta bahsda g'olibni aniqlashning imkoni bo'lmagan. Bu o'yinlarda “sherlar” 121ta gol urishgan va 35ta gol o'tkazib yuborishgan.

O'zaro o'yinlarning oxirgi 8tasida "Paxtakor" 8 marta g'alabaga erishgan. So'nggi bor "Metallurg" 2016 yilgi mavsumda "sherlar"ni mag'lub etgan edi.

O'tgan mavsum har ikkala o'zaro bahsda ham SHota Arveladze boshchiligidagi jamoa 2:1 hisoblarida g'olib bo'lgan. "Paxtakor" aynan Bekoboddagi g'alabadan keyin rasman chempionlikka erishgan edi.