Samvel Babayan: "Maydonga g'alabani ko'zlagan holda tushamiz"

Samvel Babayan ("Paxtakor" bosh murabbiyi): - Bizni qiziqarli o'yin kutib turibdi. Toshkentda jamoalar bir-biriga munosib raqib ekanligini isbotlashdi. "Al Ayn" Osiyoning eng kuchli klublaridan biri. Toshkentdagi mag'lubiyatimiz o'yinga to'g'ri kelmagandi. O'sha bahsda raqib omadliroq chiqdi. Vazifamiz eng yaxshi o'yinlarimizdan birini ko'rsatish. Bizni ijobiy natija qoniqtiradi.

Raqib legioner futbolchilarsiz ham kuchli jamoaga ega. Har bir chiziqda va zaxira o'rindig'ida ham mahoratli o'yinchilari bor. Bizda esa klub falsafasi boshqacharoq. Asosiy urg'uni mahalliy futbolchilarga qaratamiz. Toshkentdagi bellashuvda 20 yoshli Javohir Sohibov o'zidan yomon taassurot qoldirmadi. Ushbu tarkib bilan Osiyoda raqobatbardosh jamoalardan biriga aylanishimiz kerak. Yangi stadionida "Al Ayn" hozircha yutqazmadi, lekin har qanday seriyaning yakuni bo'ladi. Biz ertaga chiroyli futbol ko'rsatib, g'alaba qozonish uchun maydonga tushamiz.

Stanislav Andreev ("Paxtakor" yarim himoyachisi): - O'yin keskin kechadi deb o'ylayman. Muxlislarimiz oldida ishonchni oqlash uchun g'alaba qozonish maqsadida keldik. Jamoada kayfiyat juda yaxshi va 3 ochkoni qo'lga kiritish uchun bor kuchimizni beramiz.