Rahimjon Davronov: “Ajoyib muhit bo'ladi. Shu tomonlama menga qiziq va yoqimli bo'lyapti”

O'z navbatida klub matbuot xizmati Davronovdan "Burgutlar" azosi sifatidagi ilk intervyusini oldi. 

- “Andijon” bilan shartnoma imzoladingiz va dastlabki taassurotlar qanday?

- Taassurotlar alo darajada. “Andijon” jamoasiga o'tganimdan xursandman. Avvalambor, menga yoqqan tomoni muxlislaridir. Ajoyib muhit bo'ladi. Shu tomonlama menga qiziq va yoqimli bo'lyapti. Tezroq chempionat boshlanishini xohlayapman. 

- Darvozabon uchun asosiy narsa nima, deb o'ylaysiz?

- Psixologiya. O'yin paytida qanaqa natija bo'lishidan qatiy nazar darvozabon birinchi navbatda o'zini yo'qotib qo'ymasligi kerak. Gol o'tkazsa ham hech qachon “sinib” qolmasligi lozim. Agar goldan keyin “sinib” qolsa yana gollar o'tkazaveradi. Shuning uchun o'ziga ishonch juda muhim. Ana shunda jamoadoshlari balki ikkita gol urib ketishi mumkin. Shu bois darvozabon uchun eng kerakligi psixologiya.

- “Andijon”dan taklif bo'lishini kutganmidingiz?

- To'g'risini aytsam, 2-3 ta variantlarim bor edi. Eng avvalo, “Lokomotiv” meni olib qolishni xohladi. “Andijon”dan taklif tushgach, birinchi o'ylaganim muxlislar va atmosfera bo'ldi. U erdagi ajoyib muhitda o'ynashni xohladim. Samvel Vyacheslavovich qo'ng'iroq qildi. Rahbariyat bilan gaplashib oldik. Har doim Samvel Babayan boshqargan jamoada katta maqsad bo'ladi. Shuning uchun ham ushbu variantni tanladim.  

- Yangi mavsumdagi intriga juda kuchli bo'ladi. “Andijon” ham tarkibini sezilarli darajada kuchaytiryapti. Xo'sh, bu yilgi chempionatdan nima kutyapsiz?

- Har bir inson oldiga katta maqsad qo'yadi. Tarkibdan kelib chiqib qaralsa, albatta vazifa yuqori. Rahbariyat ham oldimizga kerakli maqsadlarni qo'yishgan. O'ylaymanki, bunday tarkib va sharoit bilan bemalol vazifani bajarsa bo'ladi. 

- Muxlislarning jamoadan umidi katta. Ular uchun nima deya olasiz?

- Ishqibozlarga gap bo'lishi mumkin emas. Oldin bu erda o'ynamagan bo'lsam ham ijtimoiy tarmoqlarda ko'rib turamizki, bunday qo'llab-quvvatlovdan keyin ularni ham, o'zimizni ham orzuyimizni amalga oshira olamiz.