Pro ligada VAR bo'lishi kerakmi? Anvar Berdiev o'z taklifini bildirdi

Anvar Berdiev ustozligidagi “Oq bo'rilar” Hokim Kubogi finalida “Lochin QDU” jamoasiga qarshi maydonga chiqdi. Qiziqarli va gollarga boy o'tgan o'yinda g'uzorliklar 3:2 hisobida g'alaba qozondi va bosh sovringa ega chiqdi. G'uzorliklar bosh murabbiyi Anvar Berdiev bu haqida o'z fikrlarini bildirdi. 

- Pro liga bahslariga ko'rilayotgan hozirlik haqida...

- Jamoamiz 7 yanvar kuni yig'ildi. 30 yanvargacha bo'lgan mashg'ulotlarda asosiy etiborni jismoniy holatimizni tiklashga qaratdik. Bu oraliqda "Mashal" va "Nasaf" U-21 jamoalari bilan nazorat uchrashuvi o'tkazdik. SHu bilan tayyorgarligimizning birinchi bosqichini yakunladik. Ikkinchi bosqichda "Hokim Kubogi"da ishtirok etish ayni muddao bo'ldi. 7-17 fevral kunlarida bu turnirda finalgacha etib borib g'olib chiqdik. Bundan so'ng 3 kunlik tanaffus berdik va 21 fevral sanasidan uchinchi bosqichga kirishdik. Endilikda mart oyigacha o'z qarorgohimizda shug'ullanamiz. Asosiy etibor bo'lajak o'yinlarga qaratiladi. Tayyorgarlik jarayonida qilishimiz kerak bo'lgan barcha ishlarni amalga oshirdik. Buning uchun klubimiz rahbarlariga minnatdorchilik bildiraman. 

- Qaysi poziciyalarni kuchaytirishga harakat qilyapsiz?

- Tarkibimizda o'zgarishlar yuz berdi. "SHo'rtan" jamoasi oldiga Superligaga chiqish vazifasi qo'yildi. Har bir chiziqni kuchaytirishga harakat qildik. O'zimizga kerakli futbolchilar bilan shartnoma tuzdik. O'ylaymanki, ular bilan oldimizga qo'yilgan vazifani bajarishga harakat qilamiz. 

- Pro ligada 8ta jamoa ishtirok etadi. Bunga munosabatingiz qanday?

- Pro ligada 8ta jamoa 4 davra o'ynaydi. O'yinlar ko'paygani ancha xursand qiladi. Futbolchilarimiz shunga qarab ham astoydil tayyorlanishyapti. Pro ligada o'tkinchi o'yinlar bo'lmaydi. Jamoalar kamaygani har bir o'yin shiddatli o'tishini taminlaydi. 

- Pro liganing asosiy muammosi nimada, deb o'ylaysiz?

- Men rahbar emasman. O'zimning taklifim, markaziy o'yinlarga VAR tizimi qo'llanilganida yaxshi bo'lar edi.