Oliy liga. 7-tur ramziy terma jamoasi

Oliy ligani muvaffaqiyatsiz boshlagan "Neftchi" nihoyat mavsumdagi ilk g'alabasini qo'lga kiritdi. Farg'onaliklar Jizzaxda "So'g'diyona" mehmoni bo'lib 1:0 hisobida zafar quchishdi. Bu g'alabada "Neftchi" posboni Abdumavlon Abdujalilovning xissasi katta bo'ldi. Raqibning bir qator xavfli zarbalarini qaytarishga erishgan Abdujalilov ramziy terma jamoadan o'rin oldi.

"Buxoro"ning legioner himoyachisi Vladimir Baenko "Mashal" bilan bahsda anchagina yaxshi harakat qildi. Himoyada ishonchli o'ynashdan tashqari raqib darvozasini ishg'ol qilishga ham erishdi.

"Qizilqum" bu turni safarda o'tkazdi. "Olmaliq" bilan uchrashuvda o'ng qanot himoyasida o'ynagan SHerali Jo'raev tezkor harakatlari va driblinglari bilan jamoasiga foyda keltirdi. Natijada navoiyliklar safardan bir ochko bilan qaytishdi.

SHu bahsda mezbonlar safida Abduqahhor Xojiakbarov ham faol bo'ldi. O'ng qanot himoyachisi o'z qanotida juda tezkor harakat qildi va jamoadoshlarini bir necha marta golli vaziyatlarga chiqardi.

Aslida "Bunyodkor"ga tegishli bo'lgan Javohir Qahramonov mavsumni ajoyib tarzda boshladi. "Dinamo"da ijarada o'ynayotgan Qahramonov "qaldirg'ochlar" bilan o'yinda juda yaxshi o'ynadi. Jamoasining yagona goliga ham aynan Javohir mualliflik qilgani qiziq holat bo'ldi.

"Qo'qon-1912" vakili Suhrob Berdiev tur qahramoni bo'ldi desak yanglishmaymiz. Sababi Berdiev "Metallurg" bilan uchrashuvda bu mavsumda oliy ligada xet-trik qayd etgan birinchi futbolchiga aylandi.

"Navbahor" bu turni o'z uyida "SHo'rtan"ga qarshi o'ynadi. O'tgan turlarda "Lokomotiv" va "Paxtakor"ni mag'lub etgan g'uzorliklar bilan bahs shiddatli kechdi. Uchrashuv taqdirini hal qilgan yagona golga mezbonlar yarim himoyachisi Oybek Qilichev mualliflik qildi.

"Mashal" 7-turda Buxoroda "Buxoro" mehmoni bo'ldi. 2:2 hisobida yakunlangan jangovor bahsda mehmonlar sardori Zafar To'raev doimgidek faol o'ynadi va o'z hisobiga gol yozib qo'ydi.

Turning markaziy bahsida "Lokomotiv" "Paxtakor"ni mag'lub etishga erishdi. Derbida "temiryo'lchilar" yarim himoyachisi Ikrom Aliboev juda ham yaxshi o'ynadi. Aldamchi harakatlari, chiroyli to'p uzatishlari va samarali harakatlari bilan jamoasiga foyda keltirgan Ikrom ramziy termaga kiritildi.

"Lokomotiv" hujumchisi Marat Bikmaev "sherlar" bilan o'yinda dublga erishib jamoasi g'alabasiga zamin yaratdi. Bikmaev oliy ligada 7ta gol bilan chempionat to'purari bo'lib turibdi.

"Nasaf" safida "Obod" bilan o'yinda gol urgan Dragan CHeran ramziy terma jamoaga kiritildi. Legioner hujumchining goli "ajdarlar"ga 3 ochko keltirdi.

Championat.asia talqiniga ko'ra oliy liganing 7-turi ramziy terma jamoasi

Darvozabon
Abdumavlon Abdujalilov "Neftchi"

Himoyachilar
Vladimir Baenko "Buxoro"
SHerali Jo'raev "Qizilqum"
Abduqahhor Xojiakbarov "Olmaliq"

Yarim himoyachilar
Javohir Qahramonov "Dinamo"
Suhrob Berdiev "Qo'qon-1912"
Oybek Qilichev "Navbahor"
Zafar To'raev "Mashal"
Ikrom Aliboev "Lokomotiv"

Hujumchilar
Marat Bikmaev "Lokomotiv"
Dragan CHeran "Nasaf"