Akmal Rustamov: "Superligada o'yinlar orasida vaqt kam. Bir kunni yo'lga sarflayapmiz, ikki kun suniy maydonda mashg'ulot qildik"

 Uchrashuvdan so'ng mehmonlar bosh murabbiyi Akmal Rustamov fikrlarini bildirib o'tdi.

"OKMK bilan o'yindan keyin Xorazmgacha uzoq yo'lni bosib o'tdik. Futbolchilarning jismoniy holatini maromiga keltirish qiyin bo'ldi. Shunga qaramay futbolchilar borlarini berdi, ularga rahmat aytmoqchiman. 2-3 nafar futbolchilarimiz Shohruz Norxonov, Islom Kenjaboev bugun ishtirok eta olishmadi. Bundan tashqari yana ayrim futbolchilardan foydalana olmadik. Yigitlar yo'qotishlarning o'rnini bilintirishmadi.

Birinchi bo'limda 3-4 ta golli vaziyat yaratdik, lekin yakuniy nuqtada qiynaldik. Navoiydan kelgan muxlislarga ham rahmat aytmoqchiman",- deydi Akmal Rustamov. 

- Superliga tarixida birinchi marotaba suniy maydonda uchrashuv bo'lib o'tdi. Maydon borasida fikringiz qanday?

- "Xorazm"da suniy maydon ekanligidan xabarimiz bor edi. O'zimizda Navoiy akademiyasi maydonida Turkiyadan keltirilgan suniy maydonda mashg'ulot o'tkazishga ulgurdik. Buning uchun akademiya rahbarlariga rahmat aytaman. O'yinda boshqacha yuklama bo'ldi. Suniy qoplamada baribir qiyin. 

- O'yin davomida vaqt cho'zishlar nimadan kelib chiqyapti?

- To'g'ri tushunishingizni so'rayman. Ular ataylab qilmayapti. O'yinlar orasida vaqt kam. 1 kun yo'lga, 2 kun mashg'ulotga sarf qilinmoqda. Futbolchilarning jismoniy holatida toliqish bor. Bu menimcha hamma jamoada yuz berayotgan holat. Charchoq shundan kelib chiqmoqda.