Odil Ahmedov "Odil Junior" (To'raqo'rg'on) akademiyasi bilan yaqindan tanishdi

Tadbirda, ayni paytda "Odil Junior" jamoasining sport direktori lavozimida faoliyat olib borayotgan Dilshod Nuraliev va jamoa murabbiyi Jahongir Usmonov ham ishtirok etdilar. Dastavval klubning 2005-2010 yillarda tug'ilgan futbolchilari ikkiga bo'lingan holda mashg'ulotlarda ishtirok etdilar. SHundan so'ng Odil Ahmedov bolalarga murojaat qildi:

- Bugun Sizlar bilan ko'rishib turganimdan xursandman. Hech nima mehnatsiz bo'lmaydi. Bir narsani aytishim mumkin, agar mehnat qilishdan qochmasangiz albatta baxt qushi elkangizga qo'nadi. Bugun yaxshi futbolchi ko'chada qolmayapti. Aksincha, jamoalar yaxshi saviyadagi futbolchilarni qidirib yurish bilan bandlar. Siz yaxshi sifatli mashg'ulot o'tkazishingiz uchun yaxshi murabbiylar kerak. SHuning uchun Alisher (Mahmudov) va Nuriddin va poytaxtdan tashrif buyuradigan murabbiylar endi bu erda sizlarga yordam beradilar. Muhimi ishlash kerak.

SHundan so'ng ota-onalarga "Odil Junior"ning asl maqsadi tushuntirib berildi. Bahor oyidan boshlab mazkur arenada 2009-11 yillarda tavallud topgan futbolchilar o'rtasida doimiy chempionat yo'lga qo'yilishi haqida xabar qilindi. Eng sara futbolchilar poytaxtdagi filialga yo'l oladilar. Katta bo'lgach esa "Navbahor" jamoasida to'p tepish imkoniyatini qo'lga kiritishlari mumkin bo'ladi.

To'raqo'rg'on Namangan braziliyasi deb bejizga aytilmagan. Bu erdagi futbolni yana qayta oyoqqa turg'azish kerak. Bu borada 2019 yilning oxirida yana bitta standart arena qad ko'tarishi ko'zda tutilgan.