"Navbahor" tarkibiga uch nafar futbolchi qo'shildi

Jamoa safiga Turkiya safaridan oldin 3 nafar yangi futbolchi qo'shildi. Darvozabon Xurshid Xo'jaev, himoyachilar – Ibrohim Yo'ldoshev va Luka CHermel yangi mavsumni “lochinlar”  tarkibida davom ettiradigan bo'lishdi.   

Mazkur futbolchilar borasida to'xtaladigan bo'lsak, tajribali darvozabon Xurshid Xo'jaev 1988 yil 14 fevralda Farg'ona viloyatining Qo'qon shahrida tug'ilgan. Katta futboldagi faoliyatini 2012 yili Farg'onaning “Neftchi”sida boshlab, ushbu jamoa darvozasini 2013 yilning yakunigacha qo'riqlagan.

Takidlash joizki, Xo'jaev klub uchun begona emas va u 2014-2015 yillar mavsumlarida “Navbahor” sharafini himoya qilgan. Keyinchalik  “Andijon” (Andijon, 2016 yil), AGMK (Olmaliq, 2017-2018 yillar), “Buxoro” (Buxoro, 2019  yil), “Istiqlol” (Farg'ona, 2020 yil), “Qo'qon-1912” (Qo'qon, 2021 yil) jamoalari darvozalarini qo'riqlagan.

Tajribali golkiper o'tgan mavsumni “Andijon”da o'tkazib, 12 ta o'yinda jamoa darvozasini qo'riqlab, andijonliklarning Pro-liga g'olibi bo'lishlari, Coca Cola Superliga-2023 yo'llanmasini qo'lga kiritishlariga o'zining munosib hissasini qo'shdi.  

Mahoratli himoyachi Ibrohim Yo'ldoshev 1999 yil 5 iyunda Toshkent shahrida tug'ilgan. Katta futboldagi faoliyatini 2016 yili Toshkentning “Paxtakor”ida boshlab, ushbu jamoada 2018 yilning yarmigacha to'p tepdi.  2018 yilning 2-davrasi va 2019 yilgi mavsumda Bekobodning “Metallurg” klubida o'ynadi. 2020 yilning 1-davrasini yana “Paxtakor”da o'tkazib, o'sha yilgi mavsumning 2-davrasi hamda 2021 yilgi mavsumni Termizning “Surxon”ida o'tkazdi. Yakunlangan mavsumda esa Samarqandning “Dinamo” jamoasida to'p tepib, O'zbekiston Coca Cola Superligasi va kubogida 28 ta o'yinda maydonga tushib, 2273 daqiqa to'p surgan holda, 1 ta gol urib, 2 ta golga assistentlik qilgan.     

Tajribali himoyachi Luka CHermel esa 1995 yilning 29 iyulida Serbiya poytaxti Belgrad shahrida tug'ilgan. Futbolchilik faoliyati davomida Serbiyaning OFK (Belgrad, 2014 yilning 1-davrasi), “Sanjelik” (Belgrad, 2014 yilning 2-davrasi), “Brodarak” (Belgrad, 2015 yilning 1-davrasi), IMT (Belgrad, 2015 yilning 2-davrasi – 2017 yilning 1-davrasi), “Teleoptik” (Zemun, 2017 yilning 2-davrasi-2018 yil), “Radnichki” (Nish, 2019 yilning 1-davrasi), “Injiya” (Injiya, 2019 yilning 2-davrasi – 2020 yil), O'zbekistonning “So'g'diyona” (Jizzax, 2021-2022 yillar) klublarida o'ynagan.

Serbiyalik futbolchi jizzaxliklar tarkibida so'nggi ikki mavsumda Coca Cola Superligasida jami 50 ta o'yinda maydonga tushib, 4177 daqiqa o'ynagan holda, 2 golga mualliflik, 3 ta golga assistentlik qilgan.

CHermel o'tgan mavsumda “So'g'diyona” tarkibida 24 ta bahsda maydonga tushib, 1911 daqiqa o'ynab, 1 tadan gol va assist muallifiga aylangan.

Xurshid Xo'jaev hamda Ibrohim Yo'ldoshev jamoa azolari bilan birgalikda Turkiyaga parvoz qilishgan bo'lsa, Luka CHermel Antalyada “Navbahor” mashg'ulotlariga qo'shiladi.     

Biz mazkur o'yinchilarning yangi mavsumda jamoamiz tarkibida yorqin o'yinlar namoyish etib, “lochinlar”ning zafarlariga o'zlarining munosib hissalarini qo'shishlariga tilakdoshmiz.

“Navbahor” PFK matbuot xizmati.