Mutaxassis fikri: "Qo'qon, Namangan va Toshkentda mezbonlar ustun keladi, "Neftchi" Qarshidan ochko bilan qaytadi"

Bugundan Superliganing 3-tur o'yinlariga start beriladi. Mazkur turdan bir nechta qiziqarli kechishi kutilayotgan uchrashuvlar o'rin olgan. Tajribali mutaxassis Abdumajit Toirov oldindagi bahslar oldidan fikrlari va taxminlari bilan o'rtoqlashdi. 

"Mavsum startidagi o'yinlar, natijalardan so'ng biror bir o'yinga alohida to'xtalish qiyin. Qisqa qilib aytganda, "Qo'qon-1912", "Navbahor" va "Paxtakor" uydagi o'yinlarda g'alaba qozonishadi. Qolgan uchrashuvlarda mehmonlarning ustunligini taxmin qilishim mumkin. Masalan, "Buxoro" o'yin mazmuni bo'yicha ikkita turda raqibidan yaxshiroq ko'rindi. Qo'qon oxirgi o'yinda juda yaxshi harakat qildi, "Sho'rtan"ning birinchi turdagi bahsini kuzatdim. OKMK tarkib, o'yin tomonlama ham bugungi kunda navoiyliklardan ustun. "Navbahor" o'z muxlislarini xursand qiladi deb o'ylayman. "Bunyodkor" - "Surxon" bellashuvida durang va Termiz jamoasi ustun kelishi ehtimoli bor. "Nasaf" - "Neftchi" uchrashuvida durang yoki farg'onaliklar g'alabasini taxmin qilaman. "Mashal" - "So'g'diyona"da mehmonlar kuchliroq. Toshkentda "Paxtakor" "Dinamo"dan kuchliroq kelsa kerak",- deydi Abdumajit Toirov.