Maksim SHackix: "O'yin 80 daqiqa davomida raqib maydon yarmida kechdi. "Al-Vasl" safida bor-yo'g'i 2ta mahalliy futbolchi bor"

"Barchaga xayrli kech. O'yinni hamma ko'rdi, yigitlar berilgan vazifalarni bajarishdi. Hozircha faqat yakuniy nuqta etishmayapti. O'yin 80 daqiqa davomida raqib maydon yarmida kechdi. Yurishlar, uzatmalar yaxshi chiqmoqda. Raqib maydonida agressivroq o'ynashimiz kerak edi. Buning ustida har kuni ishlayapmiz. Bo'lmasa ustunlik bizning jamoada edi. Bunday o'yinlar bo'lib turadi.  Bilmadim, qanotlardan qancha uzatmalarni amalga oshirdik. Juda ko'p" - deydi Maksim SHackix.

-"Neftchi" zich himoyalandi. Bunday taktikaga qarshi qanday o'ynash mumkin? 

- Faqat qanotlar orqali. Raqib ham bizni o'rgangan. To'g'ri aytdingiz, ular darvozaga yaqin joylashishdi. Futbolchilarga qanotlarda ko'proq va tezroq o'ynashni aytgandik. Oldindagi uchlik biroz ulgurishmadi. Aytganimdek uzatmalar bo'lmadi emas. Deylik, Xojiakbar Alijonovda yaxshi vaziyat yuzaga kelgandi. Bunday vaziyatda faqat qanotlar va uzoqdan zarbalar ishga tushishi kerak. "Neftchi" ham yomon jamoa emas, munosib himoyalandi. Ko'rinib turibdiki, ular bugun shunday o'yinni istashgan. Orqa chiziqda bexato o'ynash bo'ldi. 

- Dragan CHeran va Sardor Sobirxo'jaev bugun nima uchun qaydnomaga kiritilmadi? 

- Draganga biroz dam berdik. Hozir har 3-4 kunda o'yinlar bo'ladi. Sardor o'zini yaxshi xis qilmadi. Azmiddinovda mikrojarohat bor edi. Hozir sog'-salomat. 

- Doston Hamdamovning zaxiradan maydonga tushirilib qaytib olinishi sababi nima? 

- Biz kimdir yomon o'ynadi deb zaxiraga olmaymiz. Almashdimi demak nimadir qo'shish kerak. Bunday o'yinlarda ochig'i qiyin bo'ladi. Doston juda yaxshi harakat qildi, unga hech qanday etirozim yo'q. U hammasini qildi. Lekin bizda zaxirada hujum vakillari qolgan, gol urishimiz kerak edi. Men vinger o'rniga tayanch yarim himoyachisini tushirolmayman. Biz zaxiralarni poziciya bo'yicha qilamiz. Oldinda OCHL uchrashuvlari bor. 

- "Paxtakor" "Al Vasl" bilan o'yinga tayyormi?

- Buni futbol ko'rsatadi. Raqib jiddiy va yaxshi jamoa  BAA chempioni, tarkibida faqat 2 nafar mahalliy futbolchi bor. Bizga qiyin bo'lishini bilamiz. 17 sanada ko'ramiz.