Kutilganidek Piter Xyuistra "Paxtakor" bosh murabbiyiga aylandi

Championat.asia sayti oldinroq xabar berganidek, SHota Arveladzening yordamchisi Piter Xyuistra "Paxtakor" bosh murabbiyiga aylandi. Rahbariyat bir qator murabbiylar nomzodini ko'rib chiqdi va yakunda Xyuistra tanlovida to'xtaldi. Katta ehtimol bilan bugun klub bosh murabbiyni rasman elon qiladi va ertangi mashg'ulotlarni niderlandiyalik murabbiyning o'zi o'tkazadi.

Piter futbolchilik faoliyatida SHotlandiyaning mashhur klublaridan biri "Glazgo Reynjers" sharafini besh mavsum himoya qilgani bilan mashhur. 125 uchrashuvda raqiblar darvozasiga 22 to'p kiritgan. Faoliyati mobaynida Piter Gollandiya, SHotlandiya, Yaponiya va Belgiya chempionatlarida jami 413 bellashuvda 78 gol urishga erishgan. Gollandiya terma jamoasida 8 o'yinda maydonga tushgan.

Xyuistra murabbiylik ishini 2001 yil "Yong Groningen" jamoasida bosh murabbiy sifatida boshlagan. 4 yillik faoliyatidan so'ng "Vitess", "Ayaks", "Trenchin" klublarida yordamchi murabbiy bo'lib ishlagan. Keyin "Yong Ayaks", "Groningen", "De Grafsxap" klublarida va Indoneziya terma jamoasida bosh murabbiy sifatida faoliyat olib bordi.
2017 yil iyun oyidan boshlab "Paxtakor"da yordamchi murabbiy bo'lib ishlab kelayotgandi.