JCH-2022 saralash. Yon qo'shnilarimiz 4-turni qanday o'tkazishdi?

Kishini xursand qilgan jihati, bugun O'zbekiston milliy terma jamoasi safarda Singapur mehmoni bo'lib 3:1 hisobida g'alaba qozondi. Qo'lga kiritilgan ikkita g'alabadan keyin vakillarimiz guruhda birinchi o'ringa ko'tarilib olishdi. 

Albatta, shu o'rinda ko'pchilikni yon qo'shnilarimiz qayd etgan natijalar qiziqtirishi tabiiy. SHu bois quyida qo'shnilarimiz bu turni qanday o'tkazishgani haqida alohida to'xtalib o'tamiz. 

Afg'oniston 

"E" guruhida bahs olib borayotgan Afg'oniston o'tgan tur safarda Ummonga 0:3 hisobida imkoniyatni boy bergandi. Bu jamoa qura jarayonida 4-savatchadan joy olgani bois bu turda dam oldi. Afg'oniston termasi 3ta o'yindan so'ng uch ochko bilan guruhda uchinchi o'rinni egallab turibdi. Jamoa hozircha faqat Bangladeshni mag'lub etgan. Afg'oniston keyingi turni 14 noyabr kuni o'z maydonida Hindistonga qarshi o'tkazadi.

Qirg'iziston

Bugun Mo'g'ulistonni 2:1 hisobida mag'lub etib qaytgan Qirg'iziston jadvalning ikkinchi pog'onasiga ko'tarilib oldi. Aleksandr Krestinin shogirdlari hisobida 6 ochko mavjud. Mo'g'uliston bilan kechgan bahsda Guljigit Alikulov va Mirlan Murzaev tomonidan kiritilgan gollar qo'shnilarimizga navbatdagi g'alabani taqdim etdi. Qirg'iziston terma jamoasi keyingi turni (14 noyabr) Bishkekda Yaponiyaga qarshi o'tkazadi. 

Tojikiston 

Yana bir yon qo'shnimiz Tojikiston terma jamoasi bu safar mag'lubiyatga uchradi. Usmon Toshev shogirdlari Dushanbeda Yaponiyani qabul qilib 0:3 hisobida imkoniyatni boy berishdi. O'yinda Takumi Minamino dublga erishgan bo'lsa, yana bir gol Takuma Asano hisobiga yozildi. Malumki, Qirg'iziston va Tojikiston saralashda bitta guruhda ishtirok etyapti va Tojikiston ham 6 ochko jamg'argan holda 3-o'rinni egallab turibdi. Tojikiston terma jamoasi 5-turni safarda Myanmaga qarshi o'tkazadi. 

Turkmaniston 

O'ziga yarasha kuchli guruhdan joy olgan Turkmaniston bu turda dam oldi. 3-turni jamoa mehmonda Livanga qarshi o'tkazib, 1:2 hisobida mag'lub bo'lgandi. Turkmanlar tarkibida avvalgi o'yinda Altimirat Annadurdiev  gol muallifi bo'ldi. Turkmaniston termasi hisobida 3 ochko bo'lib, guruh jadvalida 4-o'rinda boryapti. Bu jamoa kelasi turda 14 noyabr kuni o'z maydonida KXDR termasini qabul qiladi.