Ilyos Zeytullaev: "Bu o'yin menga katta dars bo'ldi"

- O'yin haqida fikringiz?

- Avvalo "Buxoro"ni O'zbekiston Kubogi yarim finaliga chiqqani bilan tabriklayman. Hozir kimnidir himoya qilib yoki kimnidir tanqid qilmoqchi emasman. Faqat shuni aytishim mumkin, bu o'yin menga katta dars bo'ldi. Bunday o'yinlar baribir murabbiyning tajribasi oshishiga yordam beradi. Futbolchilarimiz ko'p harakat qilishdi. Hatto hisobni 2:2 ko'rinishga keltira oldik. Oxirgi yigirma kun ichida to'rtinchi yo beshinchi uchrashuvni o'tkazdik. Shu bois charchoq alomatlari sezildi. Afsuski, o'zimizga xos bo'lmagan o'yinni namoyish etishga o'tib oldik. Barcha masuliyatni o'z bo'ynimga olaman. Shogirdlarimga hech narsa demayman, chunki ular mening aytganlarimni bajarishdi. Orqaga yo'l yo'q, oldinga qarab harakat qilishda davom etamiz.

- "Buxoro" bugun hujumkor va yaxshi o'ynadi. Jamoangiz bunday o'yinga tayyor emasmidi?

- To'g'risini aytsam, bugun raqibning ko'zida olov ko'proq ko'rindi. Bunaqasi futbolda uchrab turadi. Lekin bizning jamoa ham yaxshi. Bitta mag'lubiyat bilan hammasi tugab qolmaydi. Futbolda yo yutasan yo yutqazasan. Yutsang xursand bo'lsan. Mag'lubiyatga uchrasang, raqibni tabriklaysan.

- Sizni yaxshi motivator sifatida bilamiz. Kubok uchrashuvlari bitta o'yindan iborat ekanini hisobga olsak, Ilyos Zeytullaevga nima etishmadi?

- Yana qaytaraman, hisobni 2:2ga olib kelganimizdan so'ng bizda umid uyg'ondi. G'alaba qozonishga harakat qildik. Toliqib qolganmiz deyapman, lekin "Buxoro" ham tinmay o'yinlarda maydonga tushyapti. Buniyam tan olish kerak. Bugun bazi futbolchilarimizda jarohat borligi pand berdi. Oxirgi paytlarda ko'p futbolchilarimiz deyarli 90 daqiqadan o'ynab kelmoqda. Bu ham tasir qiladi. Endi ozroq dam olib Superliganing qolgan turlariga etiborni qaratamiz.