Janubiy Koreya U-23 bosh murabbiyi: "Biz raqibga qaraganda bir kun kam dam oldik"

CHorak finalda Yaponiyani 4:0 hisobida mag'lub etgan O'zbekiston U-23 terma jamoasi ertaga finalga chiqish uchun Janubiy Koreyaga qarshi bahs olib boradi. Bugun o'yindan oldingi matbuot anjumani tashkil etildi.

Janubiy koreyalik futbolchilar avvalgi bosqichda Malayziyani 2:1 hisobida engishdi. Bu jamoa shuningdek, guruh bosqichida Avstraliyani 3:2 hisobida mag'lub etgan.

O'yindan oldingi matbuot anjumanida J.Koreya bosh murabbiyi Kim Bong Gil shunday dedi:

- "Yarim finalgacha etib keldik va buning uchun hamma shogirdlarimga rahmat. Endi yarim finalda O'zbekiston bilan o'ynaymiz. Men ko'rdimki, raqibning himoya va hujum chizig'ida yaxshigina bog'liqlik bor. Bazi o'yinchilarim toliqqan, shuningdek ayrimlarida jarohat bor. Ammo finalga chiqish uchun bor kuchni ishga solamiz".

- "Biz raqibga qaraganda bir kun kam dam oldik, bu esa yaxshi bo'lmasligi mumkin. Lekin yutqazib qo'ysak bu bahona bo'la olmaydi. Albatta, kamchiliklarimiz bor va o'yindan o'yinga ularni to'g'rilash ustida ishlayapmiz".

- "Biz hamma o'yinlarni mana stadionda o'tkazdik, balki bu ham ustunlik berishi mumkin. Ammo biz ham boshqalar bilan bir xil sharoitdamiz, chunki barcha jamoalar Xitoyda o'ynayapti".