"Jahon chempionatiga chiqqan mamlakatda o'ynayman - bu qarorimdan hech ham afsuslanmayman" - “So'g'diyona”ning yangi posboni

Serbiya futboli maktabidan chiqqan yangi darvozabon Nikola Mirkovich Jizzax klubi bilan shartnoma imzolab, O'zbekiston Superligasidagi yangi chaqiriqlarga tayyor ekanini bildirdi. U klubga kelib qolish jarayoni, o'zbek futboli haqidagi ilk taassurotlari, jamoadagi shaxsiy maqsadlari hamda bosh murabbiy Ivan Boshkovich bilan o'tgan suhbati haqida so'zlab berdi.

— "So'g'diyona"ga kelishingiz qanday yuz berdi?

— Barchasi oddiy yuz berdi. O'zbekiston Superligasida o'ynagan sobiq futbolchi Ivan Yosovich meni “So'g'diyona” murabbiylariga taklif qildi. Shu tariqa bu erga kelib qoldim.

— Yangi jamoa, O'zbekiston chempionati haqida nimalarni bilasiz?

— O'zbekiston va bu er futboli haqida iliq fikrlar eshitganman. Oxirgi yillarda ko'plab serbiyalik futbolchilar bu erda to'p tepdi va hozir ham o'ynashmoqda. Mamlakat terma jamoasining Jahon chempionatiga chiqqani ham katta natija. O'zbek futboli juda tez rivojlanmoqda. Shuning uchun qarorimdan hech ham afsuslanmayman.

— Darvozabon Milan Mitrovich “So'g'diyona” darvozasini 8 yil qo'riqladi. Sizda niyatlar qanday?

— Milan Mitrovichni yaxshi bilaman va uning “So'g'diyona”dagi 8 yillik faoliyatiga katta hurmat bilan qarayman. Bu uning yuqori saviyali darvozabon ekanidan dalolat. Yangi mavsumda maksimal kuchimni ishga solishga tayyorman. “So'g'diyona” bilan yuqori o'rinlar uchun kurashishni niyat qilganman.

— Bosh murabbiy Ivan Boshkovich bilan gaplashdingizmi? Suhbat qanday o'tdi?

— Ha, Ivan Boshkovich bilan suhbatlashdim. U har bir futbolchidan o'z vazifasini astoydil bajarishni talab qiladigan murabbiy. Men jamoa uchun bor kuchimni berishga tayyorman.

— Yangi mavsumga tayyorgarlik qanday ketyapti?

— Tayyorgarlikning dastlabki qismini Jizzaxda o'tkazdik. Bu menga jamoaga tezroq moslashishga va muhit bilan tanishishga yordam berdi. Endi Antaliyada formaga kirib olish va chempionat startga to'liq tayyor holatda etib kelish ustida ishlaymiz.

— O'zbekistonda o'ynagan serbiyalik futbolchilar orasidan eng yaxshilarini ayta olasizmi?

— O'zbekiston chempionatida ko'plab serbiyalik futbolchilar o'ynab kelgan. Hammasini hurmat qilaman. Ayniqsa, Dragan Cheran, Yovan Jokich va Marko Stanoevichni alohida takidlagan bo'lardim. Ular 5 yildan ortiq vaqt davomida O'zbekiston Superligasida muvaffaqiyatli to'p tepishdi.