Lyupcho Doriev muvaffaqiyatsiz natijalar, zaxiraga olinganining sababi hamda terma jamoaga chaqiruv haqida fikr bildirdi

– Joriy mavsumdagi ilk golingiz bilan tabriklayman. Yangi mavsumda ham o'tgan mavsumdagidek to'purar Dorievni ko'rishimiz mumkinmi?

– Rahmat, albatta shunga umid qilaman. Birinchi navbatda, biz o'yinni juda yomon boshladik. Buni kutmagandik, lekin oldinga intildik. Umid qilamanki, keyingi o'yinda bor kuchimizni ishga solamiz. "So'g'diyona"da jamoa yangilandi. Har yili 4 yoki 6 ta o'yinchini almashtiramiz va boshida moslashish qiyin bo'ladi. U erda hamma narsa yangi. Umid qilamanki, borgan sari yaxshilanib boramiz.

– Birinchi bo'limda ajoyib gol urganingizga qaramay, tanaffusda zaxiraga olindingiz.

– Ha, oyog'imda og'riq sezdim. Umid qilamanki, hammasi yaxshi bo'ladi.

– Shimoliy Makedoniya terma jamoasiga chaqirildingiz. Bugungi golingiz jahon chempionati saralash o'yinlari oldidan turtki beradimi?

– Ha, men tayyorman. Chaqiruvdan juda minnatdorman. Bir yarim yildan so'ng terma jamoaga qaytdim va u erda ham hammasi yaxshi bo'lishiga umid qilaman.

– OKMK darvozasiga ko'p gol urasiz. Bu jamoa haqida qanday fikrdasiz?

– Ha, nima desam ekan... OKMKga qarshi o'ynashni yaxshi ko'raman. Menga ularning uslubi yoqadi, chunki ular ham biz kabi ochiq futbol namoyish etishadi va men bundan zavqlanaman.

VIDEO