Eldorbek Suyunov: “Restartdan so'ng hech qaysi jamoadan kutilmagan natija yoki sensaciya kutmayapman. CHunki...”

Kecha yakuniga etgan galdagi mashg'ulotlardan so'ng “sherlar”ning mahoratli posboni Eldorbek Suyunovga yuzlandik va bo'lajak taqvim, yig'in xususidagi fikrlari bilan qiziqdik.

“Karantindan keyin hayotimizda bo'lgani kabi futbolda ham o'zgarishlar bo'lishi tabiiy. Ikki oy davomida individual mashg'ulotlarni to'xtatganimiz yo'q. Lekin, futbolda jamoaviy shug'ullanmasangiz sport formangizni ushlab tura olmaysiz. Futbolchilar sekin-asta optimal holatga kirib borishmoqda. Restartdagi birinchi uchrashuvga jiddiy hozirlik ko'rmoqdamiz. Biz hozir oldindagi og'ir taqvimni emas, tezroq chempionat bahslari boshlanishini kutyapmiz. Jahonda o'z ligalarida qatnashayotgan yuqori maqsadlarni qo'ygan klublarda ham taqvim biznikidan ham tig'iz bo'ladi. Biz ham oldimizga yuksak vazifalarni qo'ygan ekanmiz bu narsalar bohona bo'la olmaydi.

Ha, hozirda Denis Ivankov bilan birga shug'ullanmayapmiz. Ibrohim Yilmaz va SHota Arveladze karantin sabab biz bilan birga emas. Bilishim bo'yicha Denis Aleksandrovich “Paxtakor”da qoladi.

Superliga davom ettirilgach hech qaysi jamoadan kutilmagan natija yoki sensaciya kutmayapman. CHunki, ayni paytda barcha bir xil holatda”,- deydi Eldorbek Suyunov.

Abdulaziz Iskandarov yozib oldi