CTA "Alaves" bilan o'yindagi Vinisius vaziyatida VAR qarorini qo'llab-quvvatladi

"Madrid" yakshanba kuni La Liganing 16-turi doirasida safarda "Alaves"ni mag'lub etdi (2:1). Ikkinchi bo'lim so'ngida Nauel Tenalya bilan to'qnashuv oqibatida Vinisius raqib jarima maydonchasi ichida yiqilganida "Real" foydasiga penalti belgilanmadi. Uchrashuvni Viktor Garsiya Verdura boshqarib bordi, VAR uchun Pablo Gonsales Fuertes javobgar edi.

CTA Gonsales Fuertesning takroriy lavhani ko'rish va "qaymoqranglilar" foydasiga penalti belgilash ehtimolini ko'rib chiqish uchun Garsiya Verdurani monitor oldiga chaqirmaslik haqidagi qarorini to'g'ri deb topdi.

"12-qoidada aytilishicha, follar o'yinchi o'ylamasdan, ehtiyotsizlik bilan harakat qilganda yoki haddan tashqari kuch ishlatganda qayd etiladi. Kontaktlarni talqin qilish harakat intensivligiga (kuchiga) bog'liq va uni har doim ham obektiv o'lchab bo'lmaydi.

Bu hakamning qabul qilishiga bog'liq. Kontakt o'yinchining yiqilishiga sabab bo'lganmi yoki yo'qligini aniqlash – hakam maydonda ko'rgan va jonli ravishda baholagan holatlari asosida talqin qilishi kerak bo'lgan masaladir.

CTA hisoblashicha, bu epizod hakam tomonidan talqin qilinishi kerak, chunki hammasi kontakt kuchiga bog'liq, shuning uchun VAR aralashmasligi kerak, negaki bu yaqqol va aniq xato emas", – deyiladi hakamlar qo'mitasi tahlilida.

Qo'mita aniq va ravshan bo'lmagan, "turlicha talqin qilishga yo'l qo'yadigan vaziyatlarda izchillikni taminlash uchun" hakam qarorini qo'llash muhimligini takidladi.

Taqqoslash uchun CTA "Selta" – "Atletik" (2:0) uchrashuvidagi VAR hakami Daniel Truxilo Suaresga Serxio Karreyra va Inyaki Uilyams ishtirokidagi epizodga aralashgani uchun hayfsan berilganini misol qilib keltirdi. Uchrashuv bosh hakami Alexandro Ernandes Ernandes harakatni jazoga loyiq emas deb topgan, ammo Truxilo Suares uni monitor oldiga chaqirgan edi.

Tenalyaning Vinisiusga nisbatan va Karreyraning Uilyamsga qarshi harakatlari deyarli bir xil deb topildi, shu sababli birinchi holatda VAR hakami bosh hakamni chaqirmay to'g'ri qilgan, ikkinchi holatda esa – xato qilgan deb hisoblandi.