"Bunyodkor" - AGMK uchrashuvi prevyusi
16 okt 2019 12:44
Yangiliklar

"Bunyodkor" - AGMK uchrashuvi prevyusi

AGMK matbuot xizmati Superliganing 22-turi doirasidagi "Bunyodkor" - AGMK uchrashuviga bag'ishlangan prevyuni taqdim etdi.

O'zbekiston Kubogi yarim finalida ketma-ket yil mag'lub etilgan "Bunyodkor" Superliganing navbatdagi turida yana jamoamizga raqiblik qiladi.
Bo'lajak o'yin ushbu jamoalarning o'zaro umumiy hisobdagi 31-uchrashuviga aylanadi. AGMK va "Bunyodkor" qarama-qarshiligi tarixiga nazar soladigan bo'lsak, o'tkazilgan o'yinlarda 5 marotaba jamoamiz g'alabani tantana qilgan, 6 bor durang qayd etilgan va 19 marta "Bunyodkor" g'alaba qozongan. To'plar nisbati ham "qaldirg'ochlar" foydasida: 61-31.
Joriy mavsum hisobidan mazkur o'yin ushbu jamoalarning to'rtinchi bellashuviga aylanadi. Qizig'i, "Bunyodkor" va AGMK joriy mavsumda uchta frontda ham o'zaro to'qnash keldi. Dastlab chempionat doirasida o'tgan Olmaliqdagi bahsda sobiq futbolchimiz Lutfullo To'raevning goli "Bunyodkor"ga g'alaba keltirgan bo'lsa, Liga kubogi va O'zbekiston kubogida AGMK "qaldirg'ochlar"ni dog'da qoldirishni uddaladi.
Ayni paytda Superliga turnir jadvalida "Bunyodkor" 35 ochko to'plagan holda 3-o'rinni egallab turibdi. AGMK hisobida esa 22 ochko mavjud va jamoamiz 10-pog'onada.
Mazkur o'yinni boshqarib borish masuliyati yosh hakam Akobir SHukurullaev zimmasiga yuklandi. Etiborlisi, Akobir SHukurullaev joriy mavsum hisobidan ikkinchi bor aynan mazkur jamoalar ishtirokidagi o'yinda ishlaydi. Bunga qadar Liga Kubogi doirasidagi AGMK - "Bunyodkor" uchrashuvini ham boshqargandi.
Umumiy hisobda esa Akobir SHukurullaev jamoamizning 5-uchrashuvida hakamlik qiladi. O'tgan yili "Lokomotiv" hamda "Qizilqum"ga qarshi o'yinlarda ishlagan SHukurullaev, joriy mavsum "Bunyodkor" hamda "Oq-tepa" bilan bo'lgan bahslarni boshqardi. AGMK Akobir SHukurullaev boshqargan uchrashuvlarda quyidagi natijalarni qayd etgan: 3 g'alaba va 1 mag'lubiyat.
Superliganing 22-turi doirasidagi "Bunyodkor" - AGMK o'rtasidagi o'yin Toshkentdagi "Bunyodkor" o'yingohida 18 oktyabr kuni soat 17:30da boshlanadi. Bir kun avval, yani 17 oktyabr kuni soat 17:00da "Bunyodkor" akademiyasi maydonida esa Yoshlar birinchiligi doirasida "Bunyodkor" va AGMK yoshlari (U21) o'zaro bahs olib borishadi.