Asror Aliqulov: "Mashal" keyingi mavsum Superligada o'ynamaydi? Bu haqda eshitganimiz yo'q"

"O'yinga kelsak, jangovar va yuqori tempda o'tdi. Ikki jamoa ham yaxshi tayyorgarlik ko'rgani sezildi. Maydon holati sifatli o'yin namoyish etishga imkon bermadi. Ikki jamoa ham uzun paslar bilan o'ynashga harakat qildi. Hisob uchrashuvga mos bo'ldi. G'alabani ko'zlab maydonga tushgandi, ammo o'xshamadi. Keyingi o'yinlarda buni to'g'rilashimiz kerak", – dedi Aliqulov.

- O'yin boshida murabbiy chizmasi o'zgargandek bo'ldi. Futbolchilar murabbiy ko'rsatmalariga qanchalik rioya qildi?

- Birinchi vazifamiz "Xorazm" futbolchilariga bo'shliq yaratib bermaslik edi. Raqib tarkibida Superligada harakat qilgan futbolchilar bor. Qaysidir holatlarda ularning ustunligi sezilib turdi. Himoyani o'ylagan holda o'zimiz ham hujum qilishni ko'zlagandik. Bundan tashqari, bosimlar ham uyushtirib turdik. Biroq hujumda texnik qobiliyatimiz baland emasligi ko'rindi. Umuman olganda, futbolchilarga oxirigacha kurashishgani uchun minnatdorlik bildiraman.

- "Mashal" Superligaga chiqqani bilan tabriklaymiz. Jamoa keyingi mavsumda Superligada o'ynamasligi, chunki ligada 2 ta Qashqadaryo vakili qatnashishi viloyatga qiyinchilik tug'diradi, degan gap-so'zlar tarqaldi...

- Bu narsa haqida eshitganimiz yo'q. Homiyimiz bizni qo'llab-quvvatlayapti. "Mashal" haqqoniy ravishda Superliga yo'llanmasini qo'lga kiritdi. O'ylaymanki, jamoa Superligaga munosib. Bu xursandchilikni tortib olish noto'g'ri deb o'ylayman.

- Superligada o'zingiz jamoaga bosh bo'lsangiz, "Mashal" o'zagi qanchalik o'zgaradi? 

- Hozir Pro liga va Superliga o'rtasidagi tafovut sezilib turibdi. Sezilib turibdiki, Pro ligadagi ayrim futbolchilar Superligada qo'nim topolmagan o'yinchilardir. Yaxshi saviyaga ega mahalliy futbolchini topish mushkul. SHuning uchun har bir jamoa legionerlar xizmatidan foydalanmoqda. Superliga saviyasi ancha o'sgan. Pro ligadan Superligaga chiqqan jamoa kuchaytirilishi tabiiy hol.