Aleksandr Krestinin: "Sodda va oddiy futbol namoyish etdik. Yaqin orada jamoada o'zgarishlar bo'lishi aniq"

- O'yin haqida

- Raqibni g'alaba bilan tabriklayman. "Dinamo" o'z imkoniyatlaridan foydalandi va gol urdi. Biz individual xatolarga yo'l qo'ydik. O'zimiz yaratgan vaziyatlardan foydalana olmadik.

- "Lokomotiv" jamoasiga bosh murabbiy sifatida tayinlanganingizga ko'p vaqt bo'lmadi. "Lokomotiv" jamoasi hozir qiyin ahvolda. Ushbu krizisni qanday engib o'tmoqchisiz? Vaziyatdan chiqib ketish bo'yicha rejalaringiz bormi?

- Albatta bor. Bizga biroz vaqt kerak. Bugun maydonda namoyish etgan o'yinimiz, biz reja qilgan futbol emas edi. Biz ancha sodda va oddiy futbol namoyish etdik. Bunday o'yin bilan natija ko'rsatishning iloji yo'q. Bugun shunday bo'lib qoldi. Nega bu holat ro'y berganini tahlil qilib chiqamiz va echim topamiz.

- Futbolchilaringizning jismoniy holati haqida nimalar deya olasiz?

- Bugungi bahsni o'zingiz ko'rdingiz. Jismoniy holatimizga havas qilib bo'lmaydi. SHu sababli juda oddiy holatlarda xatolarga yo'l qo'ydik. Hozir qiyin davr, ammo biz o'zimizni majburlab bo'lsa ham kurashishimiz kerak. G'alaba uchun maksimal ravishda kurashish lozim.

- "Lokomotiv"ning sobiq bosh murabbiy Aleksandr Stoymirovich ham "Bunyodkor"ga qarshi kechgan o'yindan so'ng futbolchilarning maydondagi harakatini umuman tushuna olmayapman degan edi. Siz ham bugun maydonda boshqacha yani rejamizda bo'lmagan o'yin bo'lib ketdi dedingiz. Bunga sabab nima?

- Keling boshqa murabbiylarning ishiga baho bermaylik. O'yin avvalida ancha ishonchli ko'rindik. Vaziyatlar ham yarata oldik. Keyin esa o'yinimizni yo'qotib qo'ydik. Nega bunday bo'lganini ko'rib chiqamiz. G'alabasiz seriyasi ham bizga ruhiy tomonlama bosim o'tkazmoqda. Biroz kayfiyat yo'q.

- Birinchi davra yakuniga qadar ikkita uchrashuv qoldi. Keyingi turdagi raqib kuchli "So'g'diyona" undan keyin esa chempionlik uchun kurashayotgan "Neftchi". Davrani yakunlab beruvchi so'ngi ikkita uchrashuv haqida gapirib o'tsangiz. SHuningdek, yozgi transferlar oynasida "Lokomotiv"da yangi futbolchilarni ko'ramizmi? Bugun jamoaning jismoniy holati yaxshi emasligi haqida aytib o'tdingiz.

- Jismoniy holatni to'g'irlashimiz mumkin. Ushbu jihat yangi transferlarga aloqasi yo'q. Transferlar bo'yicha ishlamoqdamiz. O'zgarishlar bo'lishi aniq.

- "Lokomotiv" jamoasi ikkinchi davrada o'z stadionida o'ynay olmaydi degan gaplar qulog'imga chalindi. Asosiy sabab maydon holati ekan. Ushbu fikrlar rostmi?

- Bu savollarni rahbariyatdan so'rasangiz to'g'riroq bo'ladi.