Aleksandr Ejov: "Xorazm" Superligada o'ynashga haqli jamoa"

"O'yin haqida gapiradigan bo'lsam, barchasi rejamiz bo'yicha ketayotgandi. Ustunlikni qo'lga olishga, vaziyatlar yaratishga harakat qildik. Lekin qizil kartochka bu rejalarga biroz putur etkazdi. Yakuniy natija mag'lubiyat bo'ldi",- deydi Aleksandr Ejov. 

- Ilk daqiqalardan hujumchisiz o'ynash taktik qaror edimi?

- Agar futbol ko'rgan bo'lsangiz bizda Temurbek Ismailov hujumchi rolida harakat qildi. Bunga qadar ham u shu poziciyada to'p tepgan va gol urgan. Murod Bobojonovda jarohat bor edi, u biz bilan safarga ham bormagandi. Jismoniy taraflama tayyor emasdi. O'yindan oldin u bilan gaplashdik, chunki 10 kunga yaqin tiklanish jarayonida edi. 

- Hakim Fuzaylovga nima bo'ldi?

- U shu erda bo'lishi kerak edi, lekin sog'lig'ini davolamoqda. O'ylaymanki, keyingi o'yinlarda murabbiy o'z o'rnida bo'ladi. Xorazmlik muxlislardan uzr so'rab qolaman. Ular bizni doim qo'llab-quvvatlamoqda. Qo'limizni pastga tushirmaymiz, oxirigacha kurashamiz. "Xorazm" Superligada o'ynashga haqli jamoa. Bu erda elita uchun infratuzilma bor. Albatta, birinchi yil qiyin bo'lyapti. Yigitlar 10 kishi qolib ham oxirigacha o'ynashdi, golli vaziyatlar yaratishdi.  Lekin to'p raqib darvozasiga kirmadi. Ishqibozlarga yana bir bor qiyin davrda olqishlab turishayotgani uchun minnatdorchilik bildiraman. Oldimizda turgan vazifani bajarishga bor kuchimizni ishga solamiz. To'g'ri, biz Superligada to'g'ridan-to'g'ri qolishni istagandik. Pley-offni rejalashatirmagandik. Superligada hech bir raqibga shunchaki engilmadik. Biz birinchi navbatda bu jamoani kuchlilar safida qolib qolishimiz kerak.