Akmal Rustamov: "Yoshlarga ishonch bildiryapmiz"

- "So'g'diyona"ga qarshi kechgan o'yindan so'ng bugungi uchrashuvga tayyorgarlik ko'rish uchun vaqtimiz kam edi. Shunga qaramay, uch kun oldin Andijonga kelib, tayyorgarlikni boshladik. Yigitlar Andijon ob-havosiga ko'nikib olishdi. "Andijon" o'z uyida juda kuchli raqib. "Andijon" muxlislari haqiqiy 12chi o'yinchi. O'tgan uchrashuvda taktik jihatdan kichik xatolarga yo'l qo'ygandik. Bir ochko bilan jamoani tabriklayman. Yigitlar barcha ko'rsatmalarni to'liq bajarishdi", - deya fikr bildirdi Akmal Rustamov bugungi bahs haqida.

- "Qizilqum" bugun besh nafar himoyachi bilan o'ynadi. Bunga sabab nima?

- Nikola Lazarevich 4-1-4-1 sxemasida o'ynayotgan edik. Hozir jamoada 4-5ta yo'qotishlar bor. O'tgan o'yinda Shahzod Rahmatullaev ham jarohat oldi. Hozirgi taktik uslubimiz o'zgaruvchan. Ayniqsa hujumga o'tgan chog'imizda. Himoyada esa 5-4-1 sxemasiga o'tib olamiz. "So'g'diyona" bilan ushbu taktikani sinab ko'rdik. Bu uslub futbolchilarga ham yoqdi. Endi ushbu uslub ustida ko'proq ishlashimiz kerak.

- Ikkinchi bo'limda zaxiradan bahsga qo'shilgan futbolchilar o'yinni qanchalik kuchaytira oldi?

- Hozir jamoada yo'qotishlar bor. Biz yoshlarga ishonch bildiryapmiz. Navoiy futbol maktabi tarbiyalanuvchilariga ishonamiz. Agar biz ularga ishonch bildirmasak, ular zaxirada qolib ketishadi. Ularni 5-10 daqiqaga bo'lsa ham maydonga tushirsak, ular yaqin kelajakda o'z o'rnini topib ketadi.