AGMK futzal jamoasi tantanali kutib olindi

AGMK futzal jamoasini kutib olish uchun klub rahbariyati va OAV vakillari ham chiqishdi. Aleksandr Petrov boshchiligidagi futzal jamoamiz Osiyo chempionatida AGMK klubi tarixidagi eng yaxshi natija, yani musobaqaning to'rtinchi o'rinini qo'lga kiritdi. SHu boisdan ham yosh tarkib bilan qita chempionatida munosib ishtirok etgan jamoamizni Toshkent xalqaro aeroportida tantanali kutib olindi va AGMK futzal jamoasi bosh murabbiyi Aleksandr Petrovga zarbop chopon kiydirildi. SHuningdek, barcha futzalchilarni karnay-surnay sadolari va gullar bilan kutib olindi.

Futzal jamoasini kutib olgan OKMK boshqaruv raisining ijtimoiy masalalar bo'yicha o'rinbosari Ulug'bek Fayazov va klub bosh direktori Muxtor Qurbonov chiqishdi. SHuningdek, AGMK telekanali muxbirlari hamda "championat.asia" sayti xodimlari mazkur jarayonni yoritish maqsadida Toshkent xalqaro aeroportiga kelishdi.

Qayd etish kerakki, AGMK futzal jamoasi o'z tarixida ilk bor Osiyo chempionati yarim finaliga chiqdi va mazkur musobaqada to'rtinchi o'rinni qo'lga kiritdi. Musobaqa davomida jami 6 uchrashuv o'tkazgan jamoamiz 3 g'alaba va 3 mag'lubiyat qayd etdi. Guruhda va 3-o'rin uchun bo'lgan bahsda Vetnamning "Tay Son Nam" jamoasiga imkoniyat boy berilgan bo'lsa, yarim finalda Eron klubi "Mes Sungun" g'alaba qozondi. Guruhda "Naft Al Vasat" hamda "Al Rayyan" va chorak finalda Tailandning "Port" jamoalari esa dog'da qoldirildi. 

SHu tariqa AGMK futzal jamoasi Osiyo chempionatida 24 marotaba gol kiritib, o'z darvozasidan 28ta to'p o'tkazib yubordi. Jamoamiz kiritgan gollarga Akbar Usmonov (6), Davron CHoriev (6), Ixtiyor Ropiev (5), Ilhomjon Hamroev (2), Husniddin Nishonov (2), Dilshod Rahmatov, Mashrab Odilov va Anasxon Rahmatovlar mualliflik qilishdi.

Bugun Toshkentga qaytib kelgan futzalchilarimiz endilikda bugundan start oladigan O'zbekiston chempionatining ikkinchi bosqichiga tayyorgarlik ko'rishadi.