Abdumavlon Abdujalilov: "G'alaba chiroyli ko'rinadi, lekin uning zamirida yotgan mehnat mashaqqatli hisoblanadi"

"Qiyin o'yin bo'lishini bilgandik. Qolaversa, o'z maydonimizda to'p tepayotganimiz uchun qimmatli ochkolarni qo'lga kiritishimiz muhim edi. "Surxon"ning hozirgi ishlari yaxshi bo'lmasa-da, boshqa jamoalarda bo'lgani singari ularning ham o'z maqsadlari bo'lishi tabiiy hol edi. Bugungi g'alabani mavsum avvalidagi yig'inlarimiz mevasi deb aytishimiz mumkin. Eng muhimi, chiroyli futbol namoyish etgan holda g'alaba qozondik. 

G'alaba chiroyli ko'rinadi, lekin uning zamirida yotgan mehnat mashaqqatlidir. Muvaffaqiyat bir yoki ikki odamning ishi emas, balki jamoaviy puxta tayyorgarlik mahsulidir.

Jamoaning asosiy tarkibida maydonga tushishi mumkin bo'lgan futbolchilar soni 11 nafardan ko'p. Hatto murabbiyning o'zi ham buni bot-bot takidlaydi. Futbolchilar ko'p bo'lgani uchun barchaga imkoniyat berilyapti. Darvoza yoki boshqa chiziqda kimni maydonga tushirish-tushirmaslik murabbiyning tanlovidir. Zaxiradan maydonga tushayotganlar ham o'yinni kuchaytirmoqda. 

Bevosita stadiondan qo'llab-quvvatlayotgan muxlislarga minnatdorchilik bildiraman. Ular har doim biz bilan birga bo'lishgan, birga bo'lishsin. Biz ham g'alabalar bilan ularni xursand qilishga harakat qilamiz", dedi Abdujalilov.