Haqiqatan ham o'tganlarni, ularning xayrli ishlarini, jasoratini yodga olmoq, ezozlamoq xalqimizga xos ezgu fazilatlardan, milliy qadriyatlarimizdan biriga aylangan.

Yaqinda, hayotlik vaqtida el-yurti uchun fidoyilik bilan xizmat qilgan, yurt ravnaqiga beqiyos xizmatlari singgan, o'zbek futbolida o'ziga xos o'chmas iz qoldirgan vohalik bir guruh shu soha namoyondalari – Qashqadaryo viloyati sobiq hokimi Nuriddin Zayniev, viloyat futbol associaciyasi sobiq birinchi vice-prezidenti Norqul Daminov hamda Respublika miqyosidagi taniqli sobiq hakam Amriddin Saydaliev xotirasiga bag'ishlangan xotira turniri o'tkazildi.

Musobaqa markazi etib, Qashqadaryo viloyatining Kasbi tumani bolalar va o'smirlar futbol maktabi yashil maydoni tanlandi. 2012-2013 yillarda tug'ilgan bolalar o'rtasida o'tgan mazkur tadbir yuksak saviyada tashkillashtirilishida marhum Amriddin aka Saydalievning farzandi Nuriddin Saydaliev hamda uning ko'plab shogirdlari nomidan Jamol Otaqulov tashabbus ko'rsatishdi.

Keskin, murosasiz va qizg'in kurashlar ostida o'tgan musobaqada Qashqadaryo viloyatining bosh jamoasi, O'zbekiston Superligasi qatnashchisi "Nasaf", shuningdek, ikkinchi liga vakili "Lokomotiv" (Qarshi), Karshi tumani "Nasaf" filiali hamda Kasbi tumani BO'FM jamoalari ishtirok etishdi. Musoboka yakunida g'olib jamoalarga esdalik diplomlari, medallar va maxsus kubok topshirildi.

Yosh futbolchilarga "Nasaf" klubi o'yinchilari tomonidan master-klass o'tkazilishi esa ushbu turnirning eng hayajonli nuqtasiga aylandi desak, hech mubolag'a bo'lmaydi.

N.ZAYNIEV, N.DAMINOV, A.SAYDALIEV XOTIRA TURNIRINING YAKUNIY KO'RINISHI

1-o'rin. Kasbi BO'FM "A" jamoasi (murabbiy - J.Ergashov).

2-o'rin. Kasbi BO'FM "B" jamoasi (murabbiy - Z.Kamolov).

3-o'rin. Qarshi shahri "Lokomotiv" jamoasi (murabbiy - B.Usmonov).

Xotira uyg'onsa go'zal!