"Реал" 19 ёшли вингер билан шартнома имзоланганини 6 август куни эълон қилганди. ОАВ маълумотларига кўра, Мадрид клуби Кот-д’Ивуар терма жамоаси аъзоси учун 125 миллион евро ҳамда 15 миллион евро бонус тўлаган ва бу "Реал" тарихидаги энг қиммат рекорд трансферга айланган.
"Унинг истеъдодини ўзингиз ҳам кўриб турибсиз. Биз уни ҳимоя қилишга ҳаракат қиламиз. Ўйинлар давомида унинг 140 миллион евролик трансфер суммаси ҳақида кўп гапиришади. У эса нега ўзига бунча пул тўланганини аллақачон исботлаб қўйди", – дея Мбаппенинг сўзларини келтирди AS нашри.
Испания чемпионатининг 6-турида "Эльче"га қарши кечган баҳсда (3:2) Диоманде голли узатмани амалга оширди. Бу унинг "қаймоқранглилар" сафидаги илк самарали ҳаракати бўлди.
"Реал" 15 очко билан Ла Лига турнир жадвалида 2-ўринни эгаллаб турибди. 1-поғонада эса "Барселона" (18 очко) бормоқда. 20 сентябрь куни "қаймоқранглилар" Испания чемпионатининг 7-тури доирасида сафарда "Атлетико" билан тўқнаш келади.
