O'tgan haftada "shaharliklar" APLning moliyaviy qoidalarini buzish bo'yicha deyarli barcha ayblovlar bo'yicha aybdor deb topilgani haqida ma'lumot paydo bo'ldi - faqat bittasidan tashqari. 2023 yilning fevral oyida APL "Siti"ni 2009 yildan 2018 yilgacha bo'lgan davrda moliyaviy qoidalarning 115 ta turli buzilishida ayblagan edi. Keyinchalik The Times gazetasi gap 115 ta emas, balki 130 ta qoidabuzarlik haqida ketayotganini xabar qildi: Premer-liga endigina ayblovlarni e'lon qilganida, bazi qoidalar bo'yicha chalkashlik yuzaga kelgan edi.
Kecha APL klub barcha ayblovlar bo'yicha aybdor deb topilganini ma'lum qildi. Xususan, bu 2009/10 yilgi mavsumdan 2017/18 yilgi mavsumgacha qo'llangan "yashirin moliyalashtirish sxemasi"ga tegishli: ushbu davr mobaynida "Siti" umumiy hisobda Abu-Dabidagi homiylardan 949,94 mln funt olgani haqida hisobot bergan. Vaholanki, aslida hamkorlar faqat 119,25 mln funt to'lashgan - qolgan qismini (830,69 mln funt) klubga egalik qiluvchi Abu Dhabi United Group (ADUG) kompaniyasi qoplagan.
Tekshiruvlar davomida "Man Siti" ushbu sxema mavjudligini rad etdi. Klub bayonotiga ko'ra, homiylarning o'zlari yuqorida ko'rsatilgan summani o'z manbalaridan to'liq to'lashgan, ADUG esa qo'shimcha mablag' kiritmagan.
Shu bilan birga, "shaharliklar" klub hamkorlari shartnoma bo'yicha o'z majburiyatlarini bajarish uchun bazan Abu-Dabi hukumatiga moliyaviy yordam so'rab murojaat qilishganini va ularning so'rovlari qanoatlantirilganini takidlashdi. Har bir holatda Abu-Dabi hukumati tomonidan taqdim etilgan moliyaviy yordam hajmi ayblov tomoni ADUG badallari deb hisoblagan summaga mos kelgan.
Ushbu ishni o'rganayotgan mustaqil komissiya klubning bunday izohlarini yolg'on deb topdi va rad etdi. U "Siti" tekshiruv boshlanganidan keyin mablag'larning haqiqiy kelib chiqishini yashirishga urinib, ushbu argumentlarni o'ylab topgan degan xulosaga keldi.
