"Бугунги ғалаба билан "Андижон" мухлисларини табриклайман. Футболчиларимизга яхши ўйин кўрсатишгани учун миннатдорчилик билдираман. Ўйинга тўхталсам, Асрор акани яхши биламан. Доим яхши жамоа шакллантириб келган. "Шўртан"нинг ўйинларини таҳлил қилганимизда осон бўлмаслигини сезгандик. Бизда жисмоний томондан ҳам кўра кўпроқ руҳий тайёргарлик қийин кечди. Бирданига кетма-кет ютуқлардан кейин эйфорияга берилиш ҳолати бўлиши мумкин эди. Лекин йигитлар билан вақтида гаплашиб олдик. Бугун улар муносиб ўйин намойиш қилишди. Якунда ғалаба қозондик", — дейди Ислом Аҳмедов.
— Бугун Драган Чераннинг хизматидан фойдаланмадингиз...
— Черандан фойдаланмоқчи эдик. Лекин ўйин вақти эртароққа қўйилгани учун иккинчи бўлимда туширишга қарор қилдик. Рақиб гол ургач эса режаларимиз ўзгариб кетди.
— Мутахассис сифатида жамоангизнинг илк голига қандай қарайсиз?
— Бу фақат бизнинг жамоада бўладиган ҳолат эмас. Ўйиннинг бир қисми, холос. Жиддий қоида бузиш деб бўлмайди. Гоҳида жарима зарбаларини ҳам жойидан олишмайди умуман ўзига ҳос айёрлик.
— Захирадан майдонга тушганлар нимани ҳал қила олишди?
— Бизда захирадан тушганлар ўйинга темп қўшмоқда, ҳужумкорликни оширишяпти. Шунинг эвазига ютиб кетяпмиз. Уларни захира футболчиси демаган бўлар эдик. Жамоамизда 2 та тенг оптимал таркиб шаклланиб бормоқда. Қўрқмасдан ротацияларга қўл ура оляпмиз.
— Молиявий қийинчиликларга қарамай "Насаф" гуруҳ етакчисими?
— Олдиндан ким етакчи бўлишини айта олмаймиз. Имкон қадар жамоамиз биринчи ўринни олишга ҳаракат қилади.
— Бугун бир нечта собиқ футболчилар "Шўртан"га қарши майдонга чиқди. Бу борада нима дея оласиз? Иккинчи савол, Азиз Турғунбоевнинг терма жамоага чақирилмаганига фикрингиз қандай?
— Биз эски жамоа ёки янги жамоага эътибор бермаймиз. Ким оптимал ҳолатда бўлса ўйнатамиз. Қаердадир ўзини эркин тутгандир ёки собиқ жамоасининг ожиз томонини билгандир. Азиз Турғунбоев Ўзбекистоннинг Жаҳон чемпионатига чиқишига ёрдам берган. Жароҳат сабабли кўп ўйинларни ўтказиб юборди. Терма жамоа мураббийида катта масъулият турибди. Бу уларнинг танлови. Аммо биз уни терма жамоага чақирилишини жуда истардик.
